Ukraina prezidenti Petro Poroşenko Keriç Boğazında Rusiye tarafından zapt etilgen Ukraina deñiz askerleriniñ ailelerinen körüşti.
Bu aqta Poroşenko salı künü, dekabrniñ 4-nde, Facebookta bildirdi.
«Deñizcilerimizniñ qorantalarına bugünki körüşüvimiz içün minnetdarım. Oğlanlarımıznı Rusiye adaletsiz mahkemesinde mahküm etemezsiñiz! Olar, Jeneva şartnamesine köre, cenk esiri ola ve iç bir Kreml mahkemesi olarnı mahküm etemez. Ne içünmi? Anda ne aqiqat, ne adalet, ne de qanun bar. Rusiye deñizcilerimizni azat etmeli. Bu esas talabımızdır. Bugün bütün dünya Putinden Ukraina qaramanlarını azat etmesini ve istilâsını toqtatmasını talap ete», – dep aytıla Ukraina prezidentinini mesacında.
Aqmescit ve Keriç mahkemeleri Keriç hastahanesinde bulunğan 3 yaralanğan askernen beraber 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı.
Ukraina Arbiy deñiz quvetleri bildirgenine köre, noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Qırımdaki Rusiye FSB idaresi bildirgenine köre, noyabrniñ 25-nde Ukrainağa ait üç arbiy gemi «Rusiyeniñ devlet sıñırından qanunsız» keçip, Keriç boğazı yolunda «telükeli areketler» yaptı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
