Ukraina prezidenti Petro Poroşenko BM Baş assambleyasınıñ 73-ünci sessiyasında Türkiye zenaatdaşı Recep Tayyip Erdoğan ile körüşti. Poroşenkonıñ matbuat hızmeti bildirgenine köre, Ukraina lideri Erdoğannı Kremlniñ siyasiy esirleri olğan Ukraina vatandaşlarınıñ azat etilmesine yardım etmege çağırdı.
«Erdoğanğa Rusiyeniñ Qırım işğalini tanımağanı ve qırımtatar halqınıñ aqlarını qorçalamağa yardım etkeni içün minnetdarım», – dep aytıla haberde.
Erdoğannıñ resmiy saytı Poroşenko ile körüşkenini tasdıqlay, lâkin devlet yolbaşçılarınıñ subet tafsilâtları aydınlatılmay.
Umumen, aq qorçalayıcılarnıñ malümatına köre, Rusiye ve işğal etilgen Qırımda 70-ke yaqın ukrainalı siyasiy mabüs tutula. Olardan bazıları narazılıq bildirip, açlıqnı ilân etti.
Qırımda mahküm etilgen ukrain faali Vladimir Baluh 2018 senesi martnıñ 19-nda başlağan müddetsiz açlıqnı devam ete. Bir aydan berli bir şey aşamağan Baluh Arhiyepiskop Klimentni diñlep, kisel içmege, peksimet aşamağa razı olğan edi.
Rusiyede mahküm etilgen ukrain rejissöri Oleg Sentsov mayısnıñ 14-nde müddetsiz açlıqnı ilân etip, Rusiye apishanelerinde tutulğan bütün ukrainalı siyasiy mabüslerni azat etmege talap etti.
