Donbastaki silâlı zıddiyet devamında 2911 ukrain arbiyi elâk oldı, dep bildirdi sentâbrniñ 19-nda Ukraina prezidenti Petro Poroşenko. Bu raqam angi künge qadar qayd etilgeni aytılmadı.
Onıñ qayd etkenine köre, ukrain halqı ve Ukraina akimiyeti «Avropağa ketmek içün iç bir vaqıt Putinden izin soramaycaq».
«Büyük bir zarar körgenimizni unutmaycaqmız. Bu aqqımız içün 2911 ukrain qaramanı cebede canını feda etti. Qararlı olıp, israr ve cesaretnen areket etecekmiz. Mustaqil birlik Ukraina oğrunda küreş devam ete, bu küreşte ğalip çıqacaqmız», – dedi Poroşenko.
Donbastaki silâlı zıddiyet Rusiye Qırımnı işğal etken soñ 2014 senesinden berli devam ete. Ukraina ve Ğarp Rusiyeni separatistlerge qoltutqanında qabaatlaylar. Kreml bunı inkâr ete. Anda Donbasta ancaq Rusiye «göñüllileri» ola bile, deyler. BM malümatına köre, zıddiyet devamında 10 300 insan elâk oldı.
