Ukraina prezidenti Petro Poroşenko, qırımtatar milliy lideri, Ukraina halq deputatı Mustafa Cemilevniñ 75 yaşını tebrikledi. Bu aqta prezidentniñ Facebooktaki resmiy saifesinde aytıla.
Poroşenkonıñ qayd etkenine köre, Cemilev «Qırımnıñ qaytması içün küreşni qaldırmay».
«Onıñ ruh küçüni ve çelik kibi tabiatını «sovetlerge qarşı baqışlarını tarqatqanı» içün yıllarnen devam etken taqip, basqı ve apisler sındırmadı. Mustafa şimdi de Qırımnıñ qaytması, Kreml esirleriniñ azat etilip, evge, Ukrainağa ait Qırımğa qaytması içün küreşni qaldırmay», – dep qayd etile.
Qırımtatar milliy lideri, Ukraina Yuqarı Radasınıñ deputatı, Ukraina prezidentiniñ qırımtatar halqı işlerinden vekâletlisi Mustafa Cemilev noyabrniñ 13-nde 75 yaşını qayd ete. Kyiv şeer Devlet memuriyetinde Cemilevniñ yubileyi munasebetinen tantanalı merasim planlaştırıla.
Mustafa Cemilev, qırımtatar halqınıñ aqları oğrunda küreşip, halqınıñ ürmetini ve qırımtatar milliy lideri statusını qazandı. 1966-1983 seneleri devamında o, altı kere apiske alınğan edi. Yedi kere mahküm etilgen Cemilev «sovetler qurumını aqaretlegen fikirleri» içün 15 yıl apiste yattı. 1975-1976 seneleri Omsk apishanesinde 303 kün açlıq narazılığını tuttı. 1986 senesi azatlıqqa çıqtı.
1991 senesinden 2013 senesine qadar Qırımtatar Milliy Meclisiniñ reisi edi. Mustafa Cemilev – III-VII çağırılış Ukraina Yuqarı Radasınıñ halq deputatı. 2014 senesi noyabr ayından berli – VIII çağırılış Ukraina halq deputatıdır.
2014 senesi avgustnıñ 20-nde Ukraina prezidenti Petro Poroşenkonıñ №657/2014 fermanı esasında Ukraina prezidentiniñ qırımtatar halqı işlerinden vekâletlisi olaraq tayin etildi.
Mustafa Cemilev Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.
