Ukraina prezidenti Petro Poroşenko, Ukraina prezidentiniñ Qırım Muhtar Cumhuriyetindeki daimiy vekili Boris Babinni işten boşattı.
Böyle vesiqa 2018 senesi dekabr 2-sinde Ukraina prezidenti saytında yerleştirildi.
Babin öz Facebook saifesinde Poroşenkonıñ qararına cevapnı derc etti:
“Yaqınlarımnı ve bu on beş ay devamında yanımda olğan adamlarğa sabır ve çıdam içün minnetdarım. Qalğanları - qiymetli tecribe içün sağ oluñız. Ebet, Qırımnı işğalden qurtarmaq içün küreş toqtamay, iş er keske yeter”, - yazdı Babin.
Babinniñ yerine kim çalışacağı daa bildirilmey, işten çıqaruvnıñ sebepleri de belli degil.
2017 senesi avgust 17-sinde Ukraina prezidenti Petro Poroşenko, Qırım Muhtar Cumhuriyetindeki daimiy vekili vazifesine ukrain uquqçısı Boris Babinni tayinledi. Bundan ğayrı, Poroşenko, Qırımda Ukrainanıñ daimiy vekiliniñ birinci muavini olaraq İzet Gdanovnı tayinlemek qararını imzaladı.
