İlhaq etilgen Qırımnıñ Rusiye tarafından arbiy bazağa çevirilmesi Qara deñiz regionınıñ havfsızlığı ve istiqrarı içün telüke ola. Bunı Ukraina prezidenti Petro Poroşenko BM Baş assambleyasınıñ 73-ünci sessiyası çerçivesinde çıqışta bulunıp ayttı.
«Eminmiz ki, Qırımnıñ askerleştirilmesi Baş assambleyanıñ büyük diqqatını ve acele seslenmesini talap ete», – dedi Poroşenko.
Onıñ qayd etkenine köre, «Rusiyeniñ tecavuziy siyaseti ve öldürici silânı qullanması telükeni arttıra».
Bundan ğayrı, Poroşenko, Kreml Azaq deñizni «işğal etmek» niyetinde olğanını aytıp, Keriç köprüniñ «qanunsız qurucılığı» aqqında hatırlattı.
Belli olğanı kibi, 50-den ziyade Rusiye uçağı, şu cümleden Tu-22M3 bombardıman uçağı, ve Qara deñiz flotunıñ 10-ğa yaqın gemisi işğal etilgen Qırımda ve Rusiyeniñ cenübinde keçirilgen talimlerde iştirak eteler.
2014 senesi Rusiyeniñ Qırım işğalinden soñ yarımadada arbiy talimler muntazam sürette keçirilip başladı. Ukraina Baş ştabı, Rusiye arbiyleriniñ areketlerini qanunsız dep adlandıra.
