Ukraina prezidenti namzeti, ameldeki devlet başı Petro Poroşenko, aprelniñ 14 ve 19-ında debatlarda iştirak etmege azır olğanını bildire, dep haber ete Azatlıq Radiosınıñ ukrain hızmeti.
“Men debatlarda mıtlaq olurım: aprelniñ 14 ve 19-ında. Siyasiy keñeşçiler tarafından tertip etilgen stenariyge köre degil de, tam malümat alıp rey bermege uquqıñız olsun dep”, - dedi Poroşenko aprelniñ 9-inde aqşam ICTV kanalınıñ “Söz serbestligi” (“Svoboda slova”) programmasınıñ efirinde.
Daa evel Poroşenko Zelenskıynı, jurnalist ve seyircilerni aprel 14-ünde “Olimpiyskiy” stadionına debatlarğa davet etti. Zelenskıy, debatlar aprelniñ 19-ında keçmeli, dep cevaplandı.
Resmiy malümatqa köre, Ukraina prezidenti saylavlarınıñ birinci basamağında Volodımır Zelenskıy içün saylavcılarnıñ 30,24%-ı rey berdi, ameldeki devlet başı Petro Poroşenko içün - 15,95%. Saylavnıñ ekinci turı aprel 21-inde keçirilecek.
Qırımlı ukrain jurnalist, Qırım.Aqiqat müellifi Pavlo Kazarın, prezident namzetleri Petro Poroşenko ve Volodımır Zelenskıynıñ debatlarını oña ve zenaatdaşı Mıroslava Barçukqa teklif etildi, dep bildirdi.
