Ukraina prezidenti Petro Poroşenko Avropa Birligi ve NATO azalığına taba strategik kurs tüzetüvleriniñ Anayasada pekitilmesine dair qanunnı imzaladı.
Vesiqa Ukraina Yuqarı Radasınıñ Rusiyeniñ Ukrainağa qarşı silâlı istilâsı başlağanınıñ beş yılına bağışlanğan toplaşuvında devlet yolbaşçısınıñ çıqışı vaqtında tantanalı sürette imzalandı.
Prezidentniñ bildirgenine köre, strategik missiyası Avropa ve Avropa atlantik integratsiyasından vazgeçmeycegini kefil etmekten ibaret. O, 2023 senesine qadar Avropa Birligine aza olmaq ve NATO azalığını qazanmaq içün areketler planını almağa vade etti.
Fevralniñ 7-nde Ukraina Yuqarı Radası Avropa Birligi ve NATO azalığına taba strategik kurs tüzetüvleriniñ Anayasada pekitilmesine dair qanun leyhasını ekinci oquvda qabul etti.
Fevralniñ 7-nde Rada NATOğa Ukrainanıñ Alyans azası olması içün yapacaq areketler planı muracaatını da qabul etti. İşbu qararğa 243 deputat qoltuttı. Muhalifet blokunıñ 16 deputatı qarşı çıqtı.
Noyabrniñ 22-nde Yuqarı Rada Avropa Birligi ve NATO azalığına taba strategik kursqa dair Anayasa tüzetüvleriniñ prezident qanun leyhasını birinci oquvda qabul etken edi.
Bundan evel Ukraina Anayasa mahkemesi işbu vesiqanı Anayasağa uyğun dep tanığan edi.
