ABD Devlet kâtibi Mike Pompeo Ukraina diplomatiyasınıñ Donbastaki vaziyetni tertiplemek ğayretlerine qoltutıp, ABD Ukrainağa «qararlı bir destek» köstere, dep qayd etti. O, Rusiye Qırım işğalini toqtatqanına qadar ABD onı mesüliyetke çekmege devam etecek, dep bildirdi.
Bu aqta Pompeonıñ Ukraina Tış işler naziri Dmıtro Kuleba ile kerçekleştirgen telefon subeti neticelerine köre Devlet departamentiniñ beyanatında aytıla, dep haber ete Azatlıq Radiosı.
«Devlet kâtibi Ukrainanıñ Rusiyeniñ qalışmağan ve tecavuziy areketleri şaraitlerinde vaziyetni tertiplemek ğayretlerine müsbet qıymet kesti. Devlet kâtibi ABDniñ Ukraina suvereniteti ve topraq bütünligine qol tutmaqta qararlı olğanını tasdıqlap, Birleşken Devletler ileride de Minsk añlaşmaları yerine ketirilgenine qadar ve Qırım işğali toqtatılğanına qadar Rusiyeni hususan sanktsiyalar vastasınen mesüliyetke çekecek, dep qayd etti», – dep aytıla beyanatta.
Berilgen malümatqa köre, taraflar Tış işler nazirleriniñ aprelniñ 30-nda «normand formatında» körüşüviniñ neticelerini muzakere etti.
Devlet kâtibi Pompeo, Rusiyeniñ yalan haberlerni tarqatıp ve Ukraina şarqındaki OSCE ve gumanitar teşkilâtlarnıñ faaliyetini sıñırlap, COVID-19 pandemiyasını qullanğanını takbih etti.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
