Ukraina mudafaa naziri Stepan Poltorak Volodımır Zelenskıy ile körüşip, onı «ordu eksperimentleri» aqqında tenbiledi. Bu aqta Poltorak «Amerikanıñ sesi» iştiraki ile Azatlıq Radiosınıñ «Nastoyaşçeye vremâ» leyhasına bergen intervyüsında ayttı.
Mudafaa naziri bunıñ kibi «eksperimentler» sebebinden Ukrainanıñ bir qısmı işğal etilgen edi, dep qoştı.
«Menim arzum – Ukrainanıñ 2014 senesine bir daa qaytmamaqtır. Ordu eksperimentleriniñ soñu yaramay ola. Biz Qırım, Donetsk ve Lugansknı coydıq», – dedi Stepan Poltorak.
Mühbirniñ prezident «memleketniñ mudafaasını daa beter yapa bilemi» sualine mudafaa naziri şöyle cevap berdi: «Birinci körüşüvden alğan teessuratlarım: o, diñledi ve o, mence, başqalarınıñ fikirlerine emiyet bere. Bugünki künde, birinci körüşüvge baqqanda, o, daa beter yapa bilecegini tüşünmeyim. İnsan ögrenmege istemeli. Ukraina prezidenti – ögrenüv ceetinden tecribeli bir insan, pek yahşı ögrene. Mence, o, aqıllı bir insan, ve yañlış adım atmaycaq. Oña tevsiye berecek insanlar da bar».
Stepan Poltorak memleketniñ yañı prezidenti Volodımır Zelenskıynıñ inauguratsiyasından soñ istifağa çıqmaq içün ariza berdi. Onıñ istifasını Yuqarı Rada qabul etmeli, buña qadar o, mudafaa naziri olıp qala.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, diger strategik obyektlerni zapt etip, Ukraina ordusınıñ areketlerini blok etken edi.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
