Advokat Nikolay Polozov, qırımtatar milliy areketiniñ veteranı Veciye Kaşkanıñ vefatınen bağlı cinaiy dava açılmasını red etüv qararını Rusiye Tahqiqat komitetine şikâyet etti.
Bu aqta Polozov Qırım.Aqiqat mühbirine tarif etti. Şikâyet vesiqası Rusiye ve İspaniya ekspertleri keçirgen ekspertizağa esaslana.
«Ekspertiza tizilgende ekspertlerniñ Veciye Kaşkanıñ küçnen tutuluvı sağlığınıñ fenalaşmasına sebep olğanından şübhesi qalmadı. Oña qarşı tahqiqat tedbirleri o yerde keçirilmese edi, o vaziyette bile onı qurtarmağa imkân bar edi. Tahqiqatçı İrina Sidiropulo Veciye Kaşka bulunğan acele yardım maşinasını tutmasa edi, qurtarmağa çare bar edi. Belki, sağ qalır edi», – dedi Polozov.
Advokat, tahqiqat tedbirleri aqqında aytıp, Türkiye vatandaşı Yusuf Aytannıñ Veciye Kaşkağa 2017 senesi noyabrniñ 23-nde qaytarğan paranıñ aluvını qayd ete.
Advokat, ekimniñ malümatına köre, tahqiqat tedbirleri vaqtında qadın endi esini coyğan edi, dep hatırlata.
«Sorğuğa çekilgen «acele yardım» ekimi, Kaşka tahqiqat tedbirleri vaqtında hırıldadı ve cevap berip olamadı, dep tasdıqladı», – dedi Polozov.
Tahqiqatçı İrina Sidiropulo ise tizilgen protokolda Kaşka vesiqanı imzalamağa razı olmadı, dep bildirdi.
Tahqiqat komitetiniñ vekilleri Polozovnıñ malümatını daa izaatlamadı.
Polozov, FSBniñ «Veciye Kaşka davasınıñ» videosını baqmağa berilmegenini bir qaç kere bildirgen edi.
2017 senesi noyabrniñ 23-nde 82 yaşında Veciye Kaşka vefat etti. Qırımtatar milliy areketiniñ veteranı FSB ve SOBR mahsus tedbirleriniñ şaatı oldı. Quvetçiler Aqmescit qavelerinden birinde dört qırımtatarı Kazim Ametov, Asan Çapuh, Ruslan Trubaç ve Bekir Degermencini tuttı. Olarnı Türkiye vatandaşı Yusuf Aytandan büyük miqdarda para talap etkenlerinde qabaatladılar.
Oña qaraman dey ediler. Bir yıl Veciye Kaşkasız (süret toplamı)
FSBniñ resmiy malümatına köre, tutulğanda Kaşka yaramadı. Qadınğa «acele yardım» çağırıldı, amma hastahanege ketkende Veciye Kaşka can berdi.
Qırımtatar milliy areketiniñ faali Nariman Celâl, faallerniñ tutulmasına sebep olğan Türkiye vatandaşı Veciye Kaşkanıñ qorantasından para hırsızladı, dep israr ete.
