Advokat Nikolay Polozovnıñ bildirgenine köre, Rusiye Tahqiqat komitetiniñ qırımtatar milliy areketiniñ veteranı Veciye Kaşkanıñ ölüminen bağlı cinaiy dava açmağa razı olmağanına qarşı berilgen istinaf arizası red etilgen soñ imayeniñ Avropa insan aqları mahkemesine muracaat etmege aqqı bar. Bu aqta o, «Ukrinformğa» ayttı.
«Qırım Yuqarı mahkemesi Veciye Kaşka davasınen bağlı istinaf şikâyetimizni red etken soñ, bu meselede Avropa insan aqları mahkemesine muracaat etmege aqqımız peyda oldı. İstinafnı red etüv vesiqalarını alğanı soñ bunı yapacaqmız. Aynı vaqıtta diger Rusiye qurulışlarına muracaat etecekmiz – temyiz mahkemesine ve nezaret olğanı olğan Rusiye Yuqarı mahkemesine», – dep ayttı Polozov.
Onıñ bildirgenine köre, istinafnı bereceklerge qol tutmaq içün kelgenlerni mahkemege almadılar – tek advokat Polozov ve Veciye Kaşkanıñ oğlu İbram Kaşka kirsetildi. Onıñ aytqanına köre, şikâyet Qırımtatar Milliy Meclisiniñ reis muavini Ahtem Çiygoznıñ mahkemesi olğan yerde baqıldı, o oturışuvlarğa Kaşka da kelgen edi.
Polozov, Qırımdaki mahkeme Rusiye Tahqiqat komitetiniñ qırımtatar milliy areketiniñ veteranı Veciye Kaşkanıñ ölüminen bağlı cinaiy dava açmağa razı olmağanına qarşı berilgen istinaf arizasını red etti, dep bildirgen edi.
Fevralniñ 14-nde Rusiye kontrolindeki Aqmescitniñ Kiyev rayon mahkemesi advokat Polozovnıñ tahqiqatçınıñ Veciye Kaşkanıñ vefatınen bağlı teşkerüv keçirmege razı olmağanına dair şikâyet arizasını red etti. Qadı Olga Kuznetsova, Kaşka «qart olıp vefat etti», dep ayttı.
Yanvarniñ soñunda Nikolay Polozov, Rusiye Tahqiqat komiteti qırımtatar milliy areketiniñ veteranı Veciye Kaşkanıñ ölüminen bağlı dava açmağa razı olmağanınen bağlı şikâyetini qanaatlendirmedi, dep bildirdi.
Polozov, oña FSBniñ «Veciye Kaşka davasınıñ» videosını baqmağa izin berilmegenini bir qaç kere bildirgen edi.
2017 senesi noyabrniñ 23-nde Aqmescitte Rusiye uquq qoruyıcıları Kâzim Ametov, Asan Çapuh, Ruslan Trubaç ve Bekir Degermencini tutıp aldı.
Olar Türkiye vatandaşı Yusuf Aytandan para talap etüvde şeklene. Rusiye uquq qoruyıcıları faallerni tutqanda qırımtatar milliy areketiniñ veteranı Veciye Kaşka yaramadı. İlk yardım maşinasında qadın can berdi.
Qırımtatar Milliy areketiniñ faali Nariman Celâlnıñ bildirgenine köre, faallerniñ tutulmasına sebep olğan Türkiye vatandaşı Veciye Kaşkanıñ qorantasından para hırsızladı.
Yanvarniñ 27-nde Kreml kontrolindeki Aqmescit Kiyev rayon mahkemesi «Veciye Kaşka davasınıñ» mabüsleri Bekir Degermenci, Kazim Ametov ve Ruslan Trubaçnıñ sıñırlav tedbirini deñiştirip, olarnı ev apsine yolladı.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
