Advokat Nikolay Polozovnıñ fikirince, Ukraina Rusiye arasında tutulğan şahıslarnıñ bugünki deñişiminden soñ Rusiyede tutulğan qırımtatarlarnı azat ettirmek içün işni devam ettirmeli.
Bu aqta o, Qırım.Aqiqatqa bildirdi.
Polozovnıñ qayd etkenine köre, deñişim cedvelinde tek bir qırımtatarı – faal Edem Bekirov – bar edi. O, avgustnıñ 27-nde işğal etilgen Aqmescit SİZOsından çıqarıldı. Amma bu istisna oldı, dep tüşüne advokat.
«Ne yazıq ki, cedvelde Edem Bekirovdan ğayrı başqa qırımtatarlar yoq edi. Ağır hasta olğanı içün onı anda kirsetkenler», – dedi Polozov.
Sentâbrniñ 7-nde Ukraina ve Rusiye arasında tutulğanlarnı deñişim kerçekleştirildi. 35 ukrainalı ile uçaq «Borıspil» Kyiv ava limanında qondı.
Ukraina Tış işler nazirliginiñ malümatına köre, Rusiye 70-ten ziyade ukrainalını qanunsız alda tuta. Olarnıñ arasına 2018 senesi noyabr ayında Qara deñiz yalısı yaqınlarında Rusiye tarafından zapt etilgen 24 ukrainalı deñizci ve Donbastaki esirler kirmemekte.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
