Qırımtatarlar Rusiye tarafından devamlı basqılarğa oğratıla. Bunı mayısnıñ 10-nda advokat Nikolay Polozov «Dom» telekanalına bildirdi. Onıñ sözlerine köre, söz izçen basqılar siyaseti aqqında kete, advokat buña «melez sürgün» dedi.
«2014-nci yıldan başlap, yedi yıl devamında Rusiye akimiyetiniñ işğalniñ aqibetlerini tanımağan Qırımdaki eñ müim içtimaiy ve milliy bir gruppa olğan qırımtatar halqına qarşı izçen basqılar siyasetini keçirgenini köremiz. Olar ise basqılarğa baqmadan tirenmege devam eteler. Söz, aman-aman yüz qırımtatar aqqında kete. Olar qanunsız sürette Rusiye apishanelerinde tutula, olarnı em işğal etilgen Qırımda tutalar, em de halqara uquq qaidelerini bozıp qıtağa avuştıralar ve anda mahkeme eteler», – dedi Polozov.
Qırımtatar Milliy Meclis reisi Refat Çubarov, Qırımda Rusiye FSB-siniñ qırımtatarlarğa daa bir tazyığı aqqında bildirdi.
Ukraina TİN başı Dmıtro Kuleba Avropada işbirlik ve telükesizlik teşkilâtınıñ Demokratik institutlar ve insan aqları bürosınıñ müdiri Matteo Mekaççi ile körüşüv vaqtında Rusiye tarafından işğal etilgen Qırımdaki insan aqlarınıñ bozuluvlarını ve ukrain siyasiy mabüsleriniñ aqlarınıñ qorunmasını muzakere etti.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
