Advokat Nikolay Polozov bildirdi ki, o, Qırımda Qırımtatar Milliy Meclisiniñ reisi Refat Çubarovğa qarşı açılğan cinaiy dava boyunca birinci temyiz şikâyetini yolladı. Advokat, şikâyetni Krasnodardaki Dördünci temyiz mahkemesi baqacaq, dep bildirdi.
«Refat Çubarovğa qarşı bu esnasnıñ başında mahkemeniñ areketleri imaye aqqını bozdı. Refat Çubarovnıñ davetinen imayeci advokat olaraq iştirak etmemniñ qanunsız red etilmesi. Bu eñ azından Avropa insan aqları ve esas serbestlikleri şartnamesiniñ 6-ncı maddesini boza», – dep yazdı Polozov Facebookta.
Advokatnıñ tahmin etkenine köre, «Çubarovnıñ davası» boyunca soñki üküm bir qaç ay içinde çıqarılacaq.
2020 senesi martnıñ soñunda Qırımdaki Rusiye Tahqiqat komitetiniñ idaresi Çubarovnı ğıyabiy şekilde qabaatladı.
Cinaiy davalar Rusiye Ceza kodeksiniñ 212-nci maddesiniñ 1-inci maddesine (qalabalıqlarnı teşkil etüv), 280.1-inci maddesiniñ 2-nci qısmı, 280.1 maddesiniñ 1-inci qısmına istinaden (Rusiye topraq bütünligini bozacaq areketlerge çağıruv) açıldı.
Aqmescitte iyülniñ 23-nde mahkemede Qırımtatar Milliy Meclisiniñ reisi Refat Çubarovğa qarşı cinaiy dava temelden baqılıp başlandı. Mahkeme vekilleri diñleyicilerni oturışuvğa ve mahkeme binasına kirsetmedi, dep bildirdi «Qırım esnası» teşebbüsiniñ faalleri.
Advokat Nikolay Polozovnıñ Qırım.Aqiqatqa bildirgenine köre, oña bu davada Çubarovnı qorçalamağa izin bermediler, çünki «menfaat zıddiyeti bar». O, bu qararnı şikâyet etmege niyetlene. Aqmescitte mahkeme advokat Polozovnıñ şikâyetini endi red etken edi.
Çubarovnıñ qayd etkenine köre, Rusiye akimiyeti «qırımtatar halqına qarşı daa bir repressiya dalğasını başlattı».
Advokat Nikolay Polozov Rusiye tahqiqatçısınıñ onı işğal altındaki Qırımda Çubarovğa qarşı kene açılğan davada imayeden çetleştirmek niyeti aqqında bildirdi.
Qırım Muhtar Cumhuriyetiniñ prokuraturası, Rusiye tahqiqatçılarınıñ Çubarovğa qarşı açılğan davanen bağlı tahqiqat başlattı.
