«Hizb ut-Tahrir davaları» boyunca Rusiye apishanelerinde tutulğan qırımtatarlarnıñ azat etilüvi ancaq Rusiye tarafı reberliginiñ siyasiy iradesi ve menfaatlarına bağlı, dep tüşüne advokat Nikolay Polozov. O, bu qırımlılarnı deñişim vaziyeti pek qıyın, dep ayttı.
Bu aqta advokat Qırım.Aqiqat mühbirine bildirdi.
«Qırımtatarlarnı aytsaq, vaziyet pek qıyın. Sentâbrde olğan deñişimden soñ Qırımda ne içün tek bir qırımtatarı, Edem Bekirov, bu cedvelge kirsetildi, dep çoq açuvlanğanlar oldı», – dep tarif etti advokat. Onıñ qayd etkenine köre, qırımtatarlar Rusiyede tutulğan ukrainalı siyasiy mabüsler cedvelinde çoqluq ola.
Polozovnıñ aytqanına köre, Rusiyede qırımlılarğa qarşı açılğan davalarnıñ maddelerine baqmadan, Oleg Sentsov, Oleksandr Kolçenko, Gennadiy Afanasyevniñ azat etilüvi «Hizb ut-Tahrir davaları» boyunca qabaatlanğan azat etilmesi mümkün olğanını köstere.
«Rusiye akimiyeti içün problem olmadı. Tek siyasiy menfaat, siyasiy irade kerek. Eminim ki, Rusiye akimiyetiniñ siyasiy menfaatı olsa, terrorizmde qabaatlanğan qırımtatarlarnı Ukrainağa teslim etüv meselesinde problem olmaycaq», – dep tüşüne advokat.
Rusiye kontrolindeki işğal etilgen Qırımnıñ insan aqları vekâletlisi Larisa Opanasük, Ukraina quvetçileri 41 qırımlını apiste tuta, dep bildirdi.
Denisova, Rusiyede apiste tutulğan ukrainalı siyasiy mabüslerniñ farqlı sayısını aydınlatqan edi: 113-ten 115-ke qadar, olardan 80-den çoqu – qırımtatarlardır. Qırımtatar resurs merkeziniñ cedvelinde 86 qırımlı siyasiy mabüs bar.
Deñişimni beklegen qırımlılarnıñ ekseriyeti – qırımtatarlar, olar bir sıra davalarnıñ, hususan «Hizb ut-Tahrir», «Tebliğ Cemaatı» davalarınıñ (Rusiyede yasaqlanğan, amma Ukrainada yasağı olmağan teşkilâtlar) mabüsleri ola. Aq qorçalayıcılar ve advokatlar bu cinaiy davalarnı diniy sebeplerden taqip dep adlandıra. Bu davalarnıñ mabüsleri – din kütken musulmanlardır.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
