Advokat Nikolay Polozov "Fevral 23 davası" kitabını Ukrainanıñ bütün büyük şeerlerinde taqdim etmek niyetindedir. Bunı o, Qırım.Aqiqatqa bildirdi.
"Birinci taqdim etüv tedbirleri Çernivtsi, Lviv ve Ternopilde olıp keçti. Bayram künleri olğanına baqmadan, menimce, ğayet yahşı keçti. Yerli cemaatçılıq tarafından çoq diqqat ve meraq bar edi. Lvivde tedbirimizge meşur dissitdent Miroslav Marinoviç keldi. Ukraina millet vekilleri de bar edi - Sofiya Fedina, Nikolay Knâjitskiy, Oleg Sinütka ve digerleri. Taqdim etüv tedbirlerniñ bir qısmı menim iştiragim olmadan keçirilecek. Çünki men Qırımğa qaytmaq kerekim. Onı, kitapnıñ baş qaramanı olğan Ahtem Çiygoz taqdim etecek", - dedi Polozov.
Advokatnıñ aytıp bergenine köre, o, fevralnıñ 26-nda Qırımnıñ Rusiye işğaline qarşı tirenüv kününde "Fevral 26 davası" kitabınıñ büyük taqdimini Kyivde keçirecek ola.
"Bu bizim soñki taqdim etüv tedbirimiz olacaq. Bellesem evelden bunı ilân etermiz. Cemaatçılıqnı, haber vastalarını davet etermiz", - dedi o.
Evel, Advokat Nikolay Polozov Ukrainanıñ esas qısmında "Fevral 26 davası" adlı kitabını taqdim ettkeni aqqında haber etilgen edi.
Aqmescitteki Rusiye kontrolindeki Qırım Yuqarı mahkemesi iyünniñ 1-nde Qırımtatar Milliy Meclisiniñ reisi Refat Çubarovnı 2014 senesi fevralniñ 26-nda Qırım parlamentiniñ binası ögünde «qalabalıqlarnı teşkil etkeninde» qabaatlap, ğıyabiy üküm çıqardı. Mahkeme Çubarovnı altı yıl apis cezasına ve 200 biñ rublege mahküm etti.
Çubarov Qırım.Aqiqatqa tefsir etip, çıqarılğan ükümni «uquq ceetinden boş» dep adlandırdı.
Qırım Muhtar Cumhuriyeti ve Aqyar prokuraturası Rusiye tahqiqatçılarınıñ Çubarovğa qarşı açqan cinaiy dava sebebinden tahqiqat başlatqan edi.
«Fevral 26 davası»
2014 senesi fevralniñ 26-nda Qırım parlamentiniñ binası ögünde Ukraina topraq bütünliginiñ tarafdarları ve duşmanlarınıñ büyük mitingi olıp keçti. Qırımtatar ve Ukraina tarafdarı faallerine qarşı Rusiye tarafdarı faaller çıqtı.
2015 senesi yanvar ayında Rusiye Tahqiqat komitetiniñ Qırım idaresi fevralniñ 26-nda mitingde olğan qalabalıqlar aqqında cinaiy dava açtı.
Ukraina topraq bütünligine qoltutqanlar tutuldı: Qırımtatar Milliy Meclisiniñ reis muavini Ahtem Çiygoz, faaller Ali Asanov, Mustafa Degermenci, Eskender Kantemirov, Talât Yunusov, Eskender Emirvaliyev, Arsen Yunusov ve Eskender Nebiyev.
Daa soñra mahkeme «fevral 26 davasını» ekige böldi: o vaqıt Qırımda Meclis lideriniñ rolüni alğan baş şübheli Ahtem Çiygoz ayrı esnasqa alındı.
Advokat Cemil Temişevniñ teşebbüsinen faal Talât Yunusov ve ATR telekanalınıñ operatorı Eskender Nebiyev tahqiqatnen işbirligi yapıp, olarnıñ ifadeleri «fevral 26 davası» diger mabüsleriniñ davalarında delil olmaycaq şartınen qabaatlarını tanıdı. 2015 senesi dekabr ayında Talât Yunusov 3,5 yılğa, Eskender Nebiyev eki yılğa şartlı olaraq üküm etildi.
2017 senesi sentâbrniñ 11-nde Rusiye mahkemesi yarımadanıñ Rusiye işğalinen bağlı narazılıqlarnı «qalabalıqlar» dep adlandırıp, Çiygoznı olarnı teşkil etkeninde qabaatladı ve sekiz yıl sert rejimli koloniyada qalmasına üküm etti. 2017 senesi oktâbrniñ 25-nde Rusiye akimiyeti Qırımda mahküm etilgen Ahtem Çiygoznı azat etip, onı Türkiyege teslim etti. Daa soñra o, Kyivge keldi.
2018 senesi iyünniñ 19-nda Kreml kontrolindeki Aqmescitniñ Merkeziy rayon mahkemesi «fevral 26 davasınıñ» mabüslerine şartlı apis cezalarını berdi. Ali Asanov ve Mustafa Degermenci 4 yıl ve 6 ay, Arsen Yunusov ve Eskender Kantemirov 4 yıl, Eskender Emirvaliyev 3 yıl ve 6 ayğa şartlı olaraq üküm etildi, er birine 3 yıl sınav müddeti berildi.
2020 senesi fevralniñ 4-nde sınav müddeti bitmegen «fevral 26 davasınıñ» mabüsi Mustafa Degermencige qarşı cinaiy mahkümiyetniñ lâğu etilgeni belli oldı.
