İşğal etilgen Qırımda ve qomşu Rusiyede tutulğan qırımlı siyasiy mabüslerniñ azat etilüvi içün Kreml Ukraina akimiyetinden yarımadağa suv bermesini talap etmesi mümkün.
Bu aqta rusiyeli advokat Nikolay Polozov «Gordon» ukrain haber resursına ayttı.
«Kremlge deñişim nege kerek? O, siyasiy saylavlar ala. Kremlge insanlar kerekmey – deñişim içün resmiy olmağan bir sebep. Şunıñ içün Moskva böyle şart qoyacağını red etmeyim: Qırımğa suv beresiñiz, biz ise, belki de, qırımlı siyasiy mabüslerni deñiştirirmiz. Kremlge daimiy basqı yapılmasa, Qırımdaki siyasiy mabüslerniñ taqdiri suqlançlı degil. Kremlniñ Qırımda reinelerni ne qadar tez alğanına baqılsa, olarnıñ sayısı arta bile. Tek soñki üç ay içinde anda dört Ukraina vatandaşı tutuldı. Yani sayıları arta, (Ukraina – QA) Prezident ofisi ise bu meseleni yavaştan körmey», – dep qayd etti Polozov.
Ukraina ve Rusiye müessiseleri Polozovnıñ aytqanlarını şimdilik izaatlamadı.
Tutulğan şahıslar soñki sefer 2019 senesi dekabrniñ 29-nda Donetsk vilâyetiniñ «Mayorsk» keçiş noqtasında deñiştirildi. Umumen almaşuv çerçivesinde Ukrainağa 76 insan teslim etildi: 12 arbiy ve 64 vatandaş.
Dekabrniñ 30-nda Ukraina prezidentiniñ Qırım Muhtar Cumhuriyetindeki temsilciligi qırımlı mabüsler kelecek basamaqta azat etilecek insanlar cedveline kirsetilecek, dep bildirdi.
Parijde dekabrniñ 9-nda aqşam Ukraina, Rusiye, Frenkistan ve Almaniya liderleriniñ körüşüvi olıp keçti. Ukraina prezidenti Frenkistan prezidenti Emmanuel Macron, Almaniya kantsleri Angela Merkel ve Rusiye prezidenti Vladimir Putin ile eki taraflı körüşüvler keçirdi.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
