Faal işbirlikçiniñ yapqanları Rusiye tarafdarı faali ve bloger Eyvaz Umerovnı Rusiye uquq qoruyıcılarınıñ repressiyalarından qurtarmay. Böyle fikirni advokat ve aq qorçalayıcı Nikolay Polozov Qırım.Aqiqatqa bildirdi, Umerovnıñ evinde keçirilgen tintüvni izaatlap.
«Eyvaz Umerov kibi basiretsiz şahıslar bile repressiya konveyer tek Rusiyeniñ Qırım işğaline qarşı tirengenlerge çalışmağanını, mefküre ceetinden açıq ağız qalğan yaqın elementlerni de içine çekkenini añlamalı. İşbirlikçilik onı qoruy ve telükesizlik kefaleti ola dep tüşünse, zemaneviy Rusiyede uquq qoruyıcılar nasıl çalışqanını iç añlamay, demek», – dep izaatladı vaziyetni advokat.
Rusiye tarafdarı qırımlı faal Eyvaz Umerov içtimaiy ağdaki saifesinde bildirgenine köre, Qırımnıñ Rusiye yolbaşçısı Sergey Aksenovnıñ mesleatçısı Ervin Musayevge zarar ketirgeni içün noyabrniñ 2-nde Rusiye quvetçileri evini tintti.
«Ekstremizm ile küreş merkeziniñ hadimleri meni qorquzmağa kelip, tintüv keçirdi! Yahşı aysa, uruşnı qabul etem!» – dep ayttı faal. Onıñ qayd etkenine köre, bunı Qırımnıñ Rusiye tarafdarı müftisi Emirali Ablayevniñ intiqamı dep saya, Umerovnıñ aytqanına köre, müfti apiske alınmasını istey eken.
Oktâbrniñ 3-nde Eyvaz Umerov Ervin Musayevni «Ukrayınağa qoltutqanında» qabaatlap kötekleşti. Musayev oña «Rusiyege qoltutqanı içün» ücüm etkenler dedi.
Qırımdaki Rusiye polisi Eyvaz Umerovğa qarşı cinaiy dava açtı. Onı «orta seviyeli zarar ketirgeninde» qabaatladılar. «Mash na volne» Telegram kanalınıñ malümatına köre, Musayevniñ mañlayında açıq yaralar bar ve közlügi parçalandı, ekimler miy sarsuvı olğanını qayd etti.
«Mirotvorets» Ukrayına merkeziniñ malümatına köre, Eyvaz Umerov Rusiyege qoltuta, Rusiyeniñ Ukrayınağa qarşı ücümini destekledi. Rusiye mahkemesinde Qırımtatar Milliy Meclisiniñ reis muavini Ahtem Çiygozqa qarşı şaatlıq etti.
Ervin Musayev «Mirotvorets» bazasında bar. Özüni Qırımnıñ Rusiye yolbaşçısı Sergey Aksenovnıñ mesleatçısı ve Rusiye kontrolindeki Bağçasaray şeer şurasınıñ deputatı olaraq tanıta. 2020 senesi fevral ayında Musayev Rusiyege qoltutqan «Millet» qırımtatar telekanalınıñ baş müdiri vazifesinden ayırıldı. 2017 senesi iyül ayında «Milletniñ» baş müdiri vazifesine tayin etilgen edi.
