Link açıqlığı

Saatnıñ esas haberi

Polozov: Cemilev, Ukraina deñizcileri advokatlarınıñ Qırımdan Moskvağa ilk barıp kelmesini maliye etken edi


Nikolay Polozov
Nikolay Polozov

Keriç boğazında Rusiye FSBsi tarafından zapt etilgen ukrainalı deñizcilerni qorçalamaq içün advokatlarnıñ işğal etilgen Qırımdan Moskvağa barıp kelmesini qırımtatarlarnıñ lideri Mustafa Cemilev maliye etken edi.

Bu aqta ukrainalı deñizciler Rusiyeden azat etilgen soñ Qırım.Aqiqatqa advokat Nikolay Polozov bildirdi.

«Advokatlarımız dekabrniñ başında davağa kirişti. Bütün advokatlar añlaşıp «pro bono» («hayır içün», «bedava» – QA) çalıştı. Amma Moskvada tahqiqat tedbirleri endi başlağan edi ve qırımtatarlarğa Moskvağa deñizcilerge barmaq kerek edi, o vaqıt bizge Mustafa Cemilev maddiy yardım kösterdi, o, özü bu davada iştirak etti. Onıñ sayesinde birinci basamaqta qırımlı advokatlarnı Moskvağa ketirip oldıq, olar vaqtında ve kerekli kibi uquqiy imayeni temin etti», – dedi advokat.

Sentâbrniñ 7-nde deñişim çerçivesinde rusiyeliler tutqan 35 ukrainalı Ukrainağa qayttı, Rusiyege Ukrainada çeşit cinayetlerde, şu cümleden Vatanğa hainlik yapqanında qabaatlanğan 35 Rusiye ve Ukraina vatandaşı teslim etildi.

2018 senesi noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.

Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».

Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.

Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.

Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.

XS
SM
MD
LG