Eki raketa Poloniyanıñ Lüblin voyevodalığındaki Pşevodov köyüne Ukrayına sıñırına yaqın tüşti, dep bildire ZET radiosı.
Kütleviy haber vastalarınıñ malümatına köre, patlavlar çiftlikte yerli saatnen 15:40-ta oldı. Neticede eki kişi elâk oldı. Polis, prokuratura ve arbiyler çalışa. Tafsilâtlı malümat berilmey. Poloniya akimiyetiniñ resmiy izaatları şimdilik yoq.
Yanğın hızmeti Pşevodovda patlavlar oldı, dep tasdıqlağan edi.
«Bu adiseniñ sebepleri şimdilik belli degil. Qurutuv azabarında patlavlar aqqında haber etildi. Kelgende bir şey olğanını tasdıqlaymız. Eki kişi o yerde can berdi», – dep bildirdi Radio Lüblin içün intervyüda üyken kapitan Martsin Lebedoviç, Hrubeşuv (o da Lüblân voyevodalığında buluna) yanğın ile küreş devlet hızmetiniñ okrug ştabınıñ matbuat kâtibi.
Poloniyanıñ baş naziri Mateuş Moravetskiy «buhran vaziyeti sebebinden» ükümetniñ telükesizlik ve mudafaa komitetiniñ acele toplaşuvını çağırdı, dep bildirdi Poloniya ükümetiniñ matbuat kâtibi Petr Müller. O, «teşkerilmegen malümatnı derc etmemege» çağırıp, izaatlar toplaşuvdan soñ olacaq, dep qoştı.
Rusiye ordusı noyabrniñ 15-nde Ukrayınağa qarşı tahminen yüz raketa attı. Bu oktâbrniñ 10-nda Qırım köpründe olğan patlavdan soñ atılğan raketa sayısından çoq oldı, dep haber etti Ukrayına Arbiy-ava quvetleriniñ matbuat kâtibi Yuriy İgnat milliy telemarafon yayınında. Oktâbrniñ 10-nda Rusiye Ukrayınağa 84 raketa attı.
Ücüm neticesinde Ukrayına şeerleriniñ bir qısmı ışıqsız qaldı.
Poloniyağa tüşken raketalar Rusiyege aitmi ve bugün Ukrayınanıñ energetika infrastrukturasına qarşı qullanıldımı ya da ava mudafaa vastaları ola – şimdilik belli degil. Poloniya – NATO azası; Rusiye Ukrayınağa qarşı büyük ücüm başlatqanından ilk sefer raketalar Poloniyağa tüşti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
