Poloniya akimiyeti «Beyazrusiyedeki yañı vaziyet» sebebinden şarqiy sıñırlarnıñ pekitilüvi aqqında bildirdi. Milliy telükesizlik ve mudafaa nazirler şurası komitetiniñ nevbetten tış toplaşuvında memleketniñ baş nazir muavini Yaroslav Kaçinskiy bildirgenine köre, böyle qarar ÇVK «Vagner» yalçılarınıñ Beyazrusiyege kelgenine dair haberlerinden soñ alındı, dep bildire Poloniya neşir agentligi.
«Beyazrusiyede yañı bir vaziyet, anda «Vagner» gruppaları buluna. Elimizde olğan malümatqa köre, anda tahminen 8 biñ arbiy olacaq», – dedi Kaçinskiy.
Onıñ aytqanına köre, şarqiy sıñırlarda sıñırcılarnıñ sayısı arttırılacaq. Bundan ğayrı, inşaat ve qoralarnıñ sayısını arttırmağa planlaştırıla.
Poloniya baş nazir muavininiñ fikirince, ÇVK «Vagnerniñ» Beyazrusiyege avuştırıluvı daa zor ola. «Gibrid cenkiniñ yañı fazası başlana bile, şimdige qadar olğan fazadan daa beter ola bile», – dep tüşüne Kaçinskiy.
Litvaniya tış işler naziri Gabrielüs Landsbergis ÇVK «Vagner» yalçıları Beyazrusiyege avuştırılsa, bu memleketniñ milliy telükesizligi içün telüke olacaq, dep bildirdi.
«Bir insannıñ – Prigojinniñ – Beyazrusiyede telükesizlik vaziyetine tesir etmey. Ordunıñ peyda olması vaziyetke tesir etecek, – dep tüşüne Landsbergis. – «Vagner» yalçıları ve talim keçirecek ve uruş areketlerine azırlanacaq baza Litvaniyağa yaqın bir yerde, NATO sıñırında olacaqtır. Bu, telükesizlik vaziyetimizni deñiştirecek».
Litvaniya devlet mudafaa şurası Beyazrusiyede vagner bazasınıñ peyda oluv haberlerinden soñ mahsus hızmetlerge Beyazrusiyede ve Rusiyeniñ Kaliningrad vilâyetinde «malümat toplauvğa daa çoq diqqat ayırmağa» emir berdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
