Poloniya prezidenti Andrzej Duda qırımtatar halqınıñ liderlerine yüksek devlet mukâfatlarını berdi, dep bildirdi Qırımtatar Milliy Meclisiniñ reisi Refat Çubarov Facebook saifesinde.
Onıñ aytqanına köre, mukâfatlav buyruğı 2021 senesi dekabrniñ 3-nde imzalandı.
Qırımtatar halqınıñ lideri, Ukraina halq deputatı Mustafa Cemilevge «Poloniya Cumhuriyetine hızmetteki yararlıqlar» nişanınıñ Büyük haçı berildi. Bu mukâfat «halqara işbirligini pekitüv ve halqlar arasında munasebetlerni inkişaf ettirüv işindeki yararlıqlar» içün eñ yüksek mukâfat ola.
Qırımtatar Milliy Meclisiniñ reis muavini İlmi Umerovğa «Poloniya Cumhuriyetine hızmetteki yararlıqlar» nişanınıñ Komandor haçı berildi.
«Poloniya Cumhuriyetine hızmetteki yararlıqlar» nişanınıñ zabit haçınen Qırımtatar Milliy Meclisiniñ azası, «Avdet» gazetasınıñ muarriri Şevket Qaybullayev, qırımtatar milliy areketiniñ veteranı, Sovetler Birligi vaqtınıñ siyasiy mabüsi Sinaver Kadırov mukâfatlandı.
Refat Çubarov Qırımtatar Milliy Meclisi adından ve şahsen mukâfat alğan safdaşlarını tebrikledi, Poloniya prezidenti Ancey Dudağa «Şarqiy ve Merkeziy Avropa halqlarınıñ azatlıq-milliy areketine qoltutuvnen beraber çoq yıllıq aq qorçalayıcı faaliyetke ve Sovetler Birliginiñ totalitar rejimi ile küreşke yüksek ve lâyıq qıymet keskenleri» içün teşekkürler bildirdi.
Qırımtatar halqınıñ lideri ve Uukraina halq deputatı Mustafa Cemilev 2022 senesi Nobel Barışıq Mukâfatına namzet kösterildi. Namzetini Poloniya Seyminiñ alt palatasınıñ spiker muavini Malgojata Gosevskaya teklif etti.
Ukraina Tış işler naziriniñ birinci muavini Emine Ceppar Poloniya Seyminiñ spiker muavini Malgojata Gosevskayağa Mustafa Cemilevniñ namzetini köstergeni içün teşekkürler bildirdi.
