Poloniya musulmanları diniy birleşmesi, saytında derc etken 2021 senesiniñ taqviminde işğal altındaki Qırım camilerini Rusiye olaraq qayd etti.
Taqvimde Kefe, Bağçasaray, Eski Qırım ve Aqmescit camileri «Rusiye Federatsiyası» yazısı ile tasvir etilgen.
Bunı Dünya qırımtatar kongressi icra komitetiniñ Poloniya azası Nedim Useinov qayd etip, içtimaiy ağlarda bu meseleni çezmege çağırdı.
«Bu aselet yapılmağan bir şey olğanına ümüt etem, muarrirniñ haberi yoqtır, neşriyat ise aşıqıp körmegendir. Yüksek musulman kollecine muracaat yollayım», – dep yazdı o.
Bu muracaatqa şimdilik cevap berilmedi.
Yaqında Ukrainanıñ Almaniya elçisi Andrey Melnik bildirgenine köre, Ukraina diplomatik müessisesi BMW şirketiniñ reberligine Rusiye qullanıcılarınıñ maşina haritalarında Qırımnıñ Rusiye olaraq işaretlengeninden muracaat etti. Esas versiyasında Qırım Ukraina olaraq qayd etilgen. BMW, mezkür qararnı «farqlı memleket qanunlarına riayet etile», dep añlattı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
