Link açıqlığı

Saatnıñ esas haberi

Politsiya tutulğan qırımtatar faaline qarşı protokollar tizdi – advokat


Rusiye politsiyası qırımtatar faali, «Grani.ru» neşiriniñ jurnalisti Vilen Temeryanovğa qarşı memuriy bozuv aqqında eki protokol tizdi. O, Aqmescitte Rusiye kontrolindeki Qırım garnizon arbiy mahkemesi ögünde, insanlar Qurmandaki «Hizb ut-Tahrir davası» mabüslerine qol tutmağa toplaşqan yerde tutuldı.

Bu aqta «Qırım birdemligi» cemaat birleşmesine advokat Rustem Kâmilev bildirdi.

«Vilen Temeryanovğa qarşı eki protokol tizildi – Rusiye Memuriy bozuv kodeksiniñ 20.2.5 maddesine («Kütleviy tedbir iştirakçisi tarafından toplaşuv, miting, numayış, yürüş ya da piket keçirüv nizamını bozuv») ve 20.6.1 maddesine («Yüksek seviyeli azırlıq rejimi ilân etilgende areket qaidelerine riayet etmeme») istinaden. Biz tenbilerimizni protokolda qayd ettik, Vilen tercimannı istedi. Bundan ğayrı, meni oña kirsetmediler, maneviy basqı yapmağa tırıştılar», – dedi Kâmilev.

Advokatnıñ aytqanına köre, tutulğan daa bir faal – Erfan Bekirovğa qarşı da protokol tizip başladılar. Advokat Ayder Azamatov kirsetilmey.

Kâmilev, tutulğan üçünci kişi – Ablâmit Ziyadinov – şimdilik iç işler rayon bölüginde buluna, «oña qarşı bir şey daa yapılmay».

«Bilgenime köre, Vilen ve Ablâmit «Qırım birdemliginiñ», «Grani.ru» neşiriniñ mühbirleri, jurnalistleri ola. Olarnı jurnalist faaliyetleri sebebinden tutqanlar», – dep qoştı advokat.

Onıñ aytqanına köre, memuriy davalar Rusiye kontrolindeki Aqmescitniñ Merkeziy rayon mahkemesine berilecek.

Aqmescitte noyabrniñ 3-nde 200-ge yaqın qırımtatarı Rusiye kontrolindeki Qırım garnizon arbiy mahkemesiniñ binası ögüne kelip, bugün Rusiyeniñ Rostov-na-Donudaki Cenübiy okrugınıñ arbiy mahkemesi tarafından umumen 42 yılğa üküm etilgen Qurmandaki «Hizb ut-Tahrir davasınıñ» mabüslerine qol tuttı.

Rustem Emiruseinovğa 17 yıl apis cezası berildi, ilk eki yılı apishanede, qalğanı sert rejimde keçecek. Arsen Abhairov 13 yılğa üküm etildi, ilk eki yılı apishanede keçecek. Eskender Abdulganiyev 12 yılğa üküm etildi, ilk eki yılını apishanede keçirecek.

«Stalin rejiminiñ usulları». Qurmandaki «Hizb ut-Tahrir davasınıñ» mabüsleri soñki sözüni ayttı (video)
Bekleñiz, lütfen

No media source currently available

0:00 0:02:05 0:00

Noyabrniñ 2-nde aqşam Qırımdan Rostov-na-Donuğa Qurmandaki «Hizb ut-Tahrir davasınıñ» mabüsleriniñ ükmü çıqarılğanına ketken yüzlernen qırımtatarı Keriç köpründe Rusiye yol patrul hızmetiniñ hadimleri tarafından tutuldı. On saat beklegen soñ insanlar Qırımğa qayttı. Advokat Nikolay Polozovnıñ qayd etkenine köre, Rusiye quvetçileri qırımtatar faallerine qarşı «areket serbestligi aqqını» bozdı.

Rusiye uquq qoruyıcı organları vaziyetni resmiy şekilde izaatlamadı.

2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı.

Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.

«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

XS
SM
MD
LG