Qırımdaki Rusiye İç işler nazirligi yılbaş bayramları arfesinde dümen başında sarhoş aydavcılarnı tapmaq içün mahsus tedbirlerni keçirecek.
Müessiseniñ matbuat hızmeti bildirgenine köre, yollardaki reydler dekabrniñ 27-nden 29-na qadar devam etecek.
«Reydler vaqtında Yol-patrul hızmeti inspektorları adiy hızmetnen beraber «kütleviy teşkerüv» usulını da qullanacaqlar, yani yolnıñ belli bir qısmında belli bir vaqıtta mümkün olğanı qadar çoq aydavcı teşkerilecek, soñra başqa yerge keçip, aynısını yapacaqlar», – dep aytıla haberde.
Berilgen malümatqa köre, politsiya hadimleri evelden belgilengen yerlerde signal konuslarınen qayd etilgen mahsus duraq ayatlarında maşinalarnı toqtatacaqlar.
«Aydavcınıñ sarhoş olğanını aytmaq içün bir sebep olsa, belli protsessual areketler yapılacaq», – dep bildire İç işler nazirligi.
Hatırlatqanlarına köre, dümen başında sarhoş olğanlarnı 30 000 ruble para cezası ve 1,5 yıldan 2 yılğa qadar maşina aydamaq yasağı bekley.
Oktâbr ayında bildirilgenine köre, Kezlevde sarhoş maşina hırsızı politsiya patrulinden saqlanmağa tırıştı.
Qurtarıcılar, Qırımda ciddiy yol qazalarınıñ sayısı arttı, dep qayd etken edi.
