Milliy politsiyanıñ reis muavini – cinaiy politsiya yolbaşçısı Yevğen Koval jurnalist Pavlo Şeremetniñ öldürilüv davasında beş şübheliniñ adını aydınlattı, dep haber ete Azatlıq Radiosı.
«Keçirilgen tahqiqat qıdıruv tedbirleri ve gruppa azalarınıñ qayd etilüvi neticesinde Pavlo Şeremetniñ öldürüvini kerçekleştirgen şahıslarnı ayırmağa imkânımız bar: bular – Yana Dugar, Yuliya Kuzmenko, (Andrey) Antonenko ve çift (Vladislav ve İnna) Grişçenkolar», – dedi Koval.
Daa evel haber etilgenine köre, politsiya, 2016 senesi iyül ayında jurnalist Pavlo Şeremetni öldürgeninden şübheli sayılğan şahıslarnı yaqaladı.
Ukraina Milliy politsiya reisiniñ birinci muavini Yevğen Kovalnıñ bildirgenine köre, 2015 senesi Herson vilâyetinde elektrik tayanğıçlarınıñ patlatılmasını teşkil etkenlerden biriniñ jurnalist Pavlo Şeremetniñ öldürilüv davası boyunca yaqalanğan mahsus tedbirler quvetleriniñ çavuşı Andrey Antonenkonen alâqaları bar.
Şübhelilerniñ İç işler nazirliginiñ qabaatlavınen bağlı açıq izaatları yoq.
Jurnalist Pavlo Şeremet 2016 senesi iyülniñ 20-nde Kyivniñ merkezinde maşina patlavı vastasınen öldürildi. Ukraina akimiyeti jurnalistniñ ölümini öldürüv olaraq tasnif ete.
2019 senesi iyül ayında tahqiqatçılar Ukraina prezidenti Volodımır Zelenskıyge Şeremetniñ öldürilüvinen bağlı gizli malümatnıñ bir qısmını açtı. O vaqıt Ukraina Milliy politsiyasınıñ reisi olğan Serğiy Knâzevniñ cinayet tahqiqatınıñ ketişatına dair maruzasından soñ Zelenskıy neticesi olacağına emin olğanını bildirdi.
