Qırımda Qarasuvbazardaki «Hizb ut-Tahrir davasınıñ» mabüsi Riza Ömerovnıñ ömür arqadaşı Sevilâ Ömerovağa politsiya hadimi kelip, bir kişilik narazılıq aktsiyası aqqında soraştırmağa tırıştı. Bu aqta advokat Lilâ Gemeci «Qırım birdemligine» bildirdi.
«Sevilâ Ömerovağa soyadı Litvinov olğan politsiya hadimi keldi. Onı soraştırmaq kerek olğanına dair malümat keldi, dep bildirdi. O, bir de bir malümat bermedi, amma Rusiye Anayasasınıñ 51-inci maddesine esaslanıp kâğıt imzaladı», – dep bildirdi Gemeci.
Qırımdaki Rusiye İç işler nazirliginiñ idaresi saytında politsiya hadiminiñ areketlerinen bağlı malümat yoq.
2020 senesi dekabrniñ 27-nde Sevilâ Ömerova Canköy rayonınıñ Qalay (Azovskoye) qasabasında bir kişilik narazılıq aktsiyasını ötkerdi. Qadınnıñ yazuvlı şiarında «Qırımtatarlar terrorist degil! Repressiyalarnı toqtatıñız! Aqayımnı azat etiñiz».
Yanvarniñ 12-nde Rusiye mahkemesi Qarasuvbazardaki «Hizb ut-Tahrir davası» mabüslerini sert rejim koloniyasında qalmalarına üküm etti. Enver Ömerov 18 yılğa, Ayder Cepparov 17 yılğa, Riza Ömerov 13 yılğa üküm etildi. Mahkümler qabaatlarını tanımay.
Ukraina ombudsmeni Lüdmila Denisova qırımlılarğa çıqarılğan ükümni takbih etti, Ukraina Tış işler nazirligi ise Rusiyeden mahkeme qararını lâğu etmesini ve qırımtatarlarnı azat etmesini talap etti. Rusiye tarafı Ukraina nazirliginiñ beyanatına daa cevap bermedi. Qırım Muhtar Cumhuriyeti ve Aqyar prokuraturası Rusiye mahkemesiniñ ükmüni «daa bir repressiya dalğası» dep adlandırdı.
Avropa elçileri Rusiyeniñ Rostov-na-Donu mahkemesiniñ Qarasuvbazardaki «Hizb ut-Tahrir davasınıñ» mabüsleri, qırımtatar musulmanları Enver Ömerov, Riza Ömerov ve Ayder Cepparovğa çıqarğan ükümini takbih etti. Olar qırımlılarnı azat etmege çağırdı.
