Rusiye aq qorçalayıcısı, cemaat erbabı ve jurnalist Aleksandr Podrabinekniñ fikirince, Rusiyeniñ yañlış malümat ve «akimiyetke sayğısızlıq» yañı qanunları işğal etilgen Qırımda «bütün küçnen» qullanılacaq. Böyle bir fikirni o, Qırım.Aqiqat Radiosınıñ yayınında bildirdi.
«Bu qanun siyasiy sistemanı tenqit etkenlerge qarşı yönelgen. Ayrı memur, ayrı qusurlarğa degil. Buña akimiyet dayanır. Amma yuqarı reberlik, akimiyetniñ federal organlarına qarşı tenqitke ise akimiyet dayanıp olamay. Bu qanun bunıñ içün qullanılacaq. Er keske qarşı degil, FSB repressiv maşinası istegenler saylanacaq», – dedi Podrabinek.
Onıñ aytqanına köre, işbu qanun «sovetlerge qarşı teşviq ve teşviqat» sovet normasınıñ «yımşaq şekli» ola.
«Sistema yañı tedbir almasa, yañı repressiv qanunlarnı qabul etmese, yaşap olamaz. Bunıñ sayesinde yaşay», – dep qayd etti Podrabinek.
Aq qorçalayıcınıñ fikirince, yañlış malümat yasağı Rusiye akimiyetiniñ fikirince «işançlı olmağanlarğa» qarşı qullanılacaq.
«Mında em yerli memur, valilerge nisbeten tenqit kire… Eskiden insanlarnı lâtife, daiyniñ süretlerine sayğısızlıq içün apiske ala ediler. Er şey bu tarafqa kete», – dep tüşüne Podrabinek.
Onıñ fikirince, yañlış malümat yasağına dair qanun ukrain haberlerini paylaşqanlarğa qarşı qullanıla bile, çünki «Kremlniñ esas duşmanlarından biri – Ukraina ve onıñ Avropa saylavı».
Martnıñ 7-nde Rusiye Devlet duması akimiyet organları, devlet timsalleri ve cemaatqa qarşı sayğısız ibadeler qullanuvı ve «yañlış» malümat paylaşuvı aqqında qanun leyhalarını soñki, üçünci oquvda qabul etti.
«Yañlış» malümat paylaşqan vatandaşlarnı 100 biñ ruble, memurlarnı 200 biñ rublege qadar, şirketlerni ise yarım million rublege qadar para cezalarına üküm etmege teklif etile. Tekrar bozuv ya da yaşav destegi, sanayı ya da banklarnıñ işine keder etken «yañlış» malümat paylaşuvı içün şirketlerge berilecek para cezası bir buçuq million rublege qadar yete bile.
«Akimiyetke nisbeten edepten tış şeklinde sayğısızlıq içün» qırımlılar ilk sefer 15 kün memuriy apis cezasını ya da 30 biñden 100 biñ rublege qadar para cezası, ekinci kere – 100 biñden 200 biñ rublege qadar para cezası, üçünci kere – 200 biñden 300 biñ rublege qadar para cezasını ala bile.
Aq qorçalayıcılarnıñ fikirince, yañı Rusiye qanunına köre qırımlılar Rusiye akimiyet organları, Rusiye timsallerine qarşı sayğısız ibareler qullanğanı içün ve ukrain kütleviy haber vastalarınıñ haberlerini paylaşqanları içün cezalandırıla bile.
