Kyivniñ işğal altındaki topraqlarda bütün Rusiye obyektleri, nişanlarını yoq etmege aqqı bar. Böyle etip Ukrayına prezidenti ofisiniñ yolbaşçı mesleatçısı Mıhaylo Podolâk The Washington Postnıñ Ukrayına ordusı tam istilânıñ yılında Moskvağa darbe endirmege planlaştırğanına dair maqalesini izaatlap ayttı.
«Bizim içün müim olğan diger maqsadlar bar… Bunı halqara uquq kefil ete, yani uquq ceetinden Qırımda, Lugansk, Donetsk, Zaporijjâ ve Herson vilâyetinde olğan er şeyni yoq etmege aqqımız bar. Mında iç bir uquq iddiamız yoq», — dep qayd etti o, Ukrayına milliy telemarafonında.
Podolâk Moskvağa qarşı darbe aqqında aytıp, bu adım Rusiye propagandasına Ukrayına Rusiyeniñ vatandaş ealisine ücüm ete dep aytmaq içün bir sebep olur dedi.
«Angi arbiy vazifelerni bir darbenen çezemiz?», – dedi memur.
The Washington Post neşiri Ukrayına Mudafaa nazirliginiñ Baş istihbarat idaresi Rusiyeniñ Ukrayınağa qarşı başlatqan tam istilâsı yılında Rusiyedeki obyektlerge darbe endirecek edi, dep yazdı.
İstihbarat yolbaşçısı Kırılo Budanov «Baş istihbara idaresiniñ elinde olğan er şeynen… fevralniñ 24-nde büyük darbelerge azır olmağa» emir bergen eken. Novorossiyskte aktsiya planlaştırılğan edi, dep aytıla – darbe deñizden trotil qullanıp yapılacaq edi. Lâkin fevralniñ 22-nde, kelgen malümatqa köre, «Baş istihbarat idaresi ABD ricasınen planlarnı deñiştirmege» ve darbe endirmemege razı oldı, dep yazğan edi neşir.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
