Rusiye mahkemesi «altıncı Bağçasaray gruppasınıñ» mabüsleri Aziz Azizov, Memet Lümanov, Rustem Osmanov ve Mustafa Abduramanovnıñ apiste qaluv müddetini uzattı. «Qırım birdemligi» haber etkenine köre, olar iyülniñ 7-ne qadar SİZOda qalacaqlar.
İmaye bu qararğa qarşı çıqıp, qabaatlavnıñ mabüsler qaça bilecegine dair delilleri yeterli degil, dep qayd etti.
«Kimse qaçarlar, bir şey yaparlar dep qorqmay, çünki olar cinayetçi degiller. Bu bir basqı usulı, özüne ve başqalarğa iftira atmağa istemegenleri içün», – dedi advokat Emil Kurbedinov.
2024 senesi martnıñ 5-nde Qırımda qırımtatarlarnıñ evlerinde kütleviy tintüvler oldı. Bağçasarayda tahqiqat tedbirleri «Qırım birdemligi» faalleriniñ evlerinde, Canköy rayonında ise din adamlarınıñ evlerinde keçirildi. Tintüvler 10 qırımtatarınıñ evinde yapıldı.
Rusiye uquq qoruyıcıları martnıñ 5-nde tutulğan qırımtatarlarnı terror teşkilâtında iştirak etkeninde qabaatladı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
