Rusiye FSBsi işğal etilgen Keriçte Moldova sakini tutuldı, dep bildirdi – o, şeerniñ suv tulumba stantsiyasını patlatacaq olğan edi, dep yaza RİA Novosti.
Berilgen malümatqa köre, 2024 senesi aprel yında mabüs internet vastasınen Ukrayina mahsus hızmetleriniñ vekillerinen işbirligi qurıp, vazifeleri üzerine malümat toplay ve yetkize edi, hususan Rusiye arbiy tehnikası ve ava mudafaasınıñ mevzileri, Qırımnıñ naqliyat ve energetika infrastrukturasınıñ obyektleri ve raketa ücümleriniñ neticelerinen bağlı foto ve video,
Uquq qoruyıcılar bildirgenine köre, gizli yerde elnen yapılğan patlayıcı cihaz tapıldı, onı Keriçteki suv tulumba stantsiyasını patlatmaq içün qullanacaq edi eken.
Rusiye tarafınıñ malümatını teşkermek ya da tasdıqlamaq imkânsız ola. Ukrayina bu malümatnı izaatlamadı.
«KrımSOS» aq qorçalayıcı teşkilâtınıñ malümatına köre, 2024 senesi eñ az 56 qırımlı Rusiye akimiyeti tarafından taqip etildi. Cinaiy davalarnıñ sebebi Rusiyede yasaqlanğan teşkilâtlarnen bağlar, devlet hainligi, casuslıq, açıq fikir bildirüvleri, diversiyalar ya da zorbalıq çağıruvlarında qabaatlavlar olğan.
Aq qorçalayıcılar Rusiye uquq qoruyıcıları açqan devlet hainligi, işbirligi ve casuslıq davaları bir qaç qat artacaqtır, dep tahmin ete. Şimdi FSB aman-aman er kün böyle davalar aça, 2014 senesine qadar olarnıñ sayısı yılda eñ çoq 10 edi. Ukrayinağa qarşı büyük istilâdan soñ devlet hainligi maddesi Rusiyede cenkke qarşı çıqqanlarğa qarşı qullanılğan maddelerden eñ populârı oldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
