Qırımnıñ Alma boyunda baar (fotogalereya)

Bağçasaray rayonınıñ bağçacılığı ve bağcılığı üç «kit balığı» – Alma, Belbek ve Qaçı boyu üstünde tura. Tamam bu yerdeki bereketli topraqlardan ale daa alma, armut, şeftali ve erikniñ bol-bol mahsulatı toplana. Alma, Belbek ve Qaçı özenleri yaznıñ sıcağında meyve tereklerine lâzim olğan suvnı bere, vadiyni sarıp alğan bayırlar ve yayla ise suvuq şimal yellerinden qorçalaylar. Eski yerli sakinler, bir vaqıtları bu yerdeki bağçalar yerli köy iqtisadiyatlarına millionlarnen kelir ketire edi, olarnıñ mahsulatı aqqında Qırım tışındaki uzaq yerlerde bile ediler, dep ikâye eteler.

Alma boyu, Qırımnıñ paytahtı Aqmescitke eñ yaqın yerde buluna. Vadiy dünya tarihında da belli: 1854 senesiniñ sentâbrinde Alma-Tarhan ve Bürlük (Vilino) köyleri yanında Rusiye ordusı ve Büyük Britaniya, Fransa ve Türkiyeden ibaret ittifaqnıñ ordusı arasında Qırım cenki devriniñ mehşur meydan uruşması olıp keçti.