Rusiye prezidenti Vladimir Putin Ukrayinada ateşkeske qoltuta, amma Moskva ola bilecek barışıq aqqında esas suallerge cevapnı daa alamadı, dep bildirdi aprelniñ 7-nde Kremlniñ matbuat kâtibi Dmitriy Peskov.
«Bu sualler avada qaldı, kimse şimdilik cevap bermedi. Bu Kyiv rejiminiñ kontrol altında olmağanınen bağlı… Bu Kyivniñ ilerideki askeriyleştirüv planlarınen bağlıdır. Bular episi kün tertibinde qala», – dedi Peskov brifingde.
Onıñ bildirgenine köre, Rusiye ve ABD eki taraf arasında bağlar devam etmek kerek olğanını añlaylar.
Soñki aftalarda Ukrayina ve ABD, Rusiye ve ABD arasında bir qaç körüşüv ve telefon subeti oldı.
Martnıñ 11-nde ABD vekilleri Ukrayinadan 30 künlik ateşkes razılığını aldı. Putin bu ğayeni red etmedi, amma şartlarını qoydı.
ABD mahsus vekili Steven Witkoff ve Rusiye vekili Kirill Dmitriyev aprelniñ 2-nde ve 3-nde Washingtonda körüştiler, bir qaç kün evelsi ABD prezidenti Donald Trump Ukrayinada ateşni toqtatuv muzakerelerinde ilerilev olmağanı içün Vladimir Putinden közü qaytqanını ayttı.
Rusiye prezidenti Vladimir Putinniñ matbuat kâtibi Dmitriy Peskov Dmitriyevniñ Washington ziyaretinden soñ RF ve ABD munasebetlerinde «diqqatlı optimizm» aqqında ayttı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
