Kremlniñ matbuat kâtibi Dmitriy Peskov, dekabrniñ 9-nda Parijde «norman formatında» keçirilecek sammit vaqtında Rusiye ve Ukraina prezidentleri Vladimir Putin ve Volodımız Zelenskıy «mıtlaqa körüşecekler», dep bildirdi.
Bu aqta o, «Rossiya 1» telekanalınıñ yayınında ayttı. Peskovnıñ bildirgenine köre, eki taraflı körüşüvniñ tam formatı daa soñra belgilenecek, dep haber ete Azatlıq Radiosı.
Peskovnıñ qayd etkenine köre, körüşüv vaqtında liderler «belli çezüvler» tapmağa tırışacaq. O, Ukraina üzerinden gaz tranziti meselesi al etilmeli, dep hatırlattı.
Putinniñ yardımcısı Yuriy Uşakovnıñ bazar künü bildirgenine köre, 30 daqqadan bir buçuq saatqa qadar devam etmesi mümkün olğan eki taraflı körüşüvni teşkil etmege «niyet» bar. Rusiye Tış işler naziri Sergey Lavrov da eki taraflı körüşüv aqqında ayttı.
Kyiv, Rusiye tarafınıñ aytqanlarını şimdilik izaatlamadı.
«Norman formatındaki» körüşüv dekabrniñ 9-nda Parijde ötkerilmeli. Bunıñ kibi muzakereler soñki sefer 2016 senesi oktâbr ayında keçirilgen edi. Ukraina prezidenti Zelenskıynıñ aytqanına köre, «norman dördü» memleketleriniñ liderleri esirlerniñ qaytuvı, ateş toqtatıluvı, Ukraina-Rusiye sıñırınıñ kontroli ve Donbastaki saylavlarnı muzakere etecekler.
