Rusiye prezidentiniñ spikeri Dmitriy Peskov Vladimir Putin ve ABD prezidenti Joe Biden yañı telefon subetini kerçekleştire bile, dep inkâr etmey. Peskovnıñ aytqanına köre, böyle subet Rusiyeniñ telükesizlik kefaletlerinen bağlı talaplarına yazma cevap berilgen soñ olacaq, dep haber ete Azatlıq Radiosı.
«Eki prezident kene laf etecegini inkâr etmeymiz. Fikirimizce, böyle munasebet alğışlanmalı, eki devlet içün de faydalıdır… Prezidentler bağlarınen bağlı qararlarnı özleri ala. Amerika tarafınıñ cevabı belli olğan soñ, prezidentlerniñ dialognı qaydan devam etecekleri añlaşılacaq», – dep bildire Peskovnıñ aytqanlarını Rusiye kütleviy haber vastaları.
ABD memuriyeti bu beyanatnı şimdilik tefsir etmedi.
Biden ve Putin dekabrniñ 30-nda telefonda laf etken ediler.
ABD prezidenti yanvarniñ 19-nda Ukrainağa keniş istilâ Rusiye içün «felâket» olur, Rusiye prezidenti Vladimir Putin ise Ğarp tarafından «daa körmegen» sanktsiyalarğa oğratılacaq, dep bildirdi.
Ücüm etüv planlarını inkâr etken Kreml yanvarniñ 20-nde ABDniñ Rusiye içün felâketli aqibetler tenbileri vaziyetni daa beter kerginleştire bile, dep bildirdi.
Keçken afta Rusiyeniñ areketlerine ve Avropa telükesizligine bağışlanğan muzakerelerniñ üçünci raundı keçirildi: eki taraflı Amerika-Rusiye, NATO-Rusiye Şurası çerçivesinde körüşüv ve OSCE muzakereleri. Bir ilerilev aqqında haber etilmedi. Moskva ve Washington kergin muzakereler vaqtında Avropa telükesizliginen bağlı «temel» añlaşamamazlıqlarnı qayd ettiler.
Bıltır küzde kütleviy haber vastalarında istihbaratnıñ Ukraina sıñırında Rusiye ordusı toplaşqanına dair malümatı peyda olıp başladı. ABD ve diger Ğarp memleketleri Moskva arbiy istilâğa azırlana, dep tahmin ettiler. Kreml bunı inkâr etip, ABD ve NATOdan telükesizlik kefaletlerini talap etti – hususan NATOnı şarqqa kenişletmemek. Moskva Washingtondan yazma şekilde cevap bermesini talap ete.
NATO, İttifaq Rusiye ile muzakerelerge azır, amma memleketlerniñ topraq bütünligine ve angi ittifaqlarğa kirmek qararını almaq aqqına ürmet kibi esas printsiplerinen bağlı uzlaşuvğa razı olmaycaq, dep bildirdi.
