Rusiye prezidenti Vladimir Putin Rusiyeni işğal etilgen Qırımnen bağlağan Keriç köprüniñ havfsızlığını temin etmek içün tedbir almağa emir etti. Bu aqta Kremlniñ matbuat kâtibi Dmitriy Peskov bildirdi.
«Baş komandan çoqtan endi emirler berdi ve kritik infrastruktura obyektleriniñ, şu cümleden köpürniñ havfsızlığını temin etmek içün bütün kerekli tedbirler alına», – dep qayd etti o.
Böylece Peskov ABDniñ Ukrayina tarafından ATACMS raketalarınıñ qullanuv sıñırlarını lâğu etmek qararı ve Keriç köprüne ücüm telükesi aqqında haberlerden soñ Rusiye qoşma havfsızlıq tedbirlerini alamı sualine cevap berdi.
Bazar künü bir çoq ğarbiy matbuat vastası ABD prezidenti Joe Bidenniñ Kyivge Rusiyeniñ terenlerinde arbiy nişanlarğa ABD raketalarınen ücüm etmege ruhset bergen qararı aqqında haber ettiler. Washington bu qararnı resmiy olaraq ilân etmedi.
Keriç köprü işğal etilgen Qırımnı Rusiyenen bağlay. 2022 senesi oktâbr ayında Qırım (Keriç) köpründe patlav oldı. 2023 senesi iyülniñ 17-nde Keriç köpründe daa bir patlav oldı. Rusiye akimiyeti ve havfsızlıq küçleri bombardılavda Ukrayina mahsus hızmetlerini qabaatladılar.
