Rusiyeniñ millionlıq şeeri Perm aprelniñ 30-nda saba kene uçucısızlarnıñ ücümine oğray, şeerde telüke signalları eşitile.
"Permde patlavlardan soñ qaza tenbileri yapıla. Permde ava telükesi ilân etildi. Yerli kanallar yañı patlavnıñ videolarını derc ete", – dep yaza Astra Telegram kanalı.
"Perm 36,6" Telegram kanalınıñ haberine köre, yañı patlav "LUKoyl" gruppasına ait "Permnefteorgsintez" müessisesi civarında oldı.
Perm devlet milliy tedqiqat universiteti aprelniñ 30-nda başta uzaqtan oquşqa keçkenini lân etti, soñra ise derslerni lâğu etti, aynı qararlar diger yerli aliy oquv yurtlarında da alındı, yerli mekteplerde de dersler yapılmaycaq.
Aprelniñ 29-nda Ukrayina Telükesizlik hızmeti Ukrayinadan 1500 km ziyade mesafede olğan Perm şeeri yaqınındaki Rusiye cermay stantsiyasına ücüm etti, dep bildirdi.
Ukrayina Telükesizlik hızmeti bildirgenine köre, dron ücümi neticesinde cermay stantsiyasında büyük yanğın çıqtı. İlk malümatqa köre, aman-aman bütün cermay savutları yana.
Müessise qayd etkenine köre, stantsiya "Transneftke" ait ve Rusiye magistral cermay naqliyat sistemasınıñ strategik müim habı ola, andan cermay dört tarafqa kete, hususan Perm cermay zavodına.
Ukrayinağa qarşı Rusiyeniñ keñ kölemli basuvı başlanğan soñ Rusiyede ve o, işğal etken topraqlarda çeşit obyektler ava ücümlerine oğray. Eñ sıq 2024 ve 2025 seneleri ücüm sebebi cermay zavodları ola. Ukrayinanıñ işğal altındaki topraqlarında da Rusiye obyektleri ücümlerge oğray.
Ukrayina Silâlı quvetleriniñ Baş ştabı darbelerniñ büyük qısmını tasdıqlap, Ukrayina Mudafaa quvetleri "Rusiye işğal ordusınıñ arbiy küçüni eksiltecek, Rusiyeni Ukrayinağa qarşı silâlı istilâğa mecbur etecek tedbirlerni muntazam sürette ala", dep bildire.