Rusiye Tahqiqat komiteti Perm universitetinde açılğan ateşnen bağlı (Rusiye Ceza kodeksiniñ 105-inci maddesiniñ 2-nci qısmı – öldürüv) cinaiy dava açıldı, dep bildirdi. Müessise, ücüm neticesinde 8 insan öldürildi, ateş açqan kişi ise yaqalanğanda yaralandı, dep bildirdi.
«Elimizde olğan malümatqa köre, sentâbrniñ 20-nde Perm devlet milliy tedqiqat universitetiniñ korpuslarından birinde bulunğan student etrafında olğanlarğa ateş açtı. Neticede 8 insan öldürildi, bir qaç kişi yaralandı. Elâk olğanlar ve yaralanğanlar aqqında tam malümat alına. Şübheliniñ şahsiyeti belli. Yaqalanğanda tirengeni içün yaralandı. Tahqiqat onıñ aqqında malümat toplay, adiseniñ bütün tafsilâtları ögrenile», – dep aytıla haberde.
Quvetçiler ateş açqannıñ ölümi aqqında malümatnı tasdıqlamay. Lâkin, «Nastoyaşçeye Vremâ» yazğanına köre, «Mediazona» ateş açqan kişi o yerde öldi, dep bildirgen edi. «İnterfaksnıñ» menbası da ateş açqan genç quvetçilernen olğan çatışmada «yoq etildi», dep haber etken edi.
İç işler nazirligi universitette «elâk olğanlar bar», dep tasdıqladı. Perm ülkesiniñ sağlıq nazirligi ücümde eñ az 10 insan yaralandı, dep bildirdi.
«Perm tibbiy müessiselerine yedi yaralanğan kişi alına, biriniñ alı ağır, altısınıñ alı orta ağır sayıla. Daa dört yaralanğan insanğa o yerde yardım kösterile», – dep aytıla nazirlikniñ matbuat hızmeti bergen haberde.
Perm ülkesiniñ valisi Dmitriy Mahonin «ücüm etkenlerden biri» öldürildi, dep bildirdi, ücüm etken başqa insanlar barmı teşkerile.
Bu sene mayıs ayında Kazandaki №175 gimnaziyasında açılğan ateş neticesinde doquz insan elâk oldı: yedi bala ve eki büyük. Daa 23 kişi yaralandı. Tataristan Cumhuriyetiniñ Tahqiqat komiteti Rusiye Ceza kodeksiniñ 105-inci maddesiniñ 2-nci qısmına istinaden – «öldürüv» – cinaiy dava açtı. İç işler nazirliginiñ malümatına köre, 19 yaşında İlnaz Galâviyev ücüm etti. O, bu mektepte oquğan edi, amma soñki 4 yıl devamında yaqından quvulğan kollecde oquy edi. Tahqiqatçılar yapqanlarınıñ sebeplerini ögrene. Rusiye Tahqiqat komiteti bildirgenine köre, 2020 senesi İlnaz Galâviyevniñ miy hastalığı aqqında belli oldı.
2018 senesi oktâbr ayında Keriç politehnik kollecinde patlav ve atış oldı. Rusiye Tahqiqat komitetiniñ malümatına köre, patlavnı 4-ünci kurs talebesi, 18 yaşında Vladislav Roslâkov kerçekleştirdi ve «özüni öldürdi». Şeerniñ Rusiye akimiyeti faciada 21 insan elâk oldı, dep bildirdi.
