ABD Mudafaa nazirligi Bahmut ve Soledar etrafında «pek şiddetli» uruşlar aqqında bildire.
«Şübhesiz, Bahmut civarında ve Soledar etrafında pek şiddetli uruşlarnı körmege devam etemiz. Bilesiñizmi, anda hususan Soledar rayonında ögge-keri areket çoq. Bunı ileride de diqqatnen taqip etecekmiz. Amma netice nasıl ola bilgeninen spekulâtsiya yapmağa istemeyim», – dep ayttı Pentagon spikeri Pat Ryder brifing vaqtında.
O, ABD Ukrayınağa qoltutmağa ve memleketiniñ imayesi içün kerek olğan telükesizlik saasında yardım etmege tırışacaq, dep qoştı.
Yanvarniñ 10-nda aqşam Rusiye kütleviy haber vastaları ÇVK «Vagner» reberi Yevgeniy Prigojinniñ malümatına esaslanıp, Rusiye quvetleri Soledarnı kontrol altına aldı, dep bildirdi. O, şeerde soqaq uruşları kete, dep ayttı.
Soñki künleri Rusiye tarafı bunıñ kibi malümatnı ilk sefer aydınlatmay.
Kyiv Rusiye Federatsiyasınıñ beyanatlarına qulaq asmadı, amma Ukrayına Mudafaa nazirligi Rusiye Soledarnı zapt etmege tırışa, dep bildirdi. Bu, şeerniñ Ukrayına arbiyleriniñ kontrolinde olğanını isbatlay.
Yanvarniñ 9-nda Ukrayına Mudafaa nazirligi Rusiye ordusı Soledarğa yañıdan ücüm etip başladı. Daa soñra Donetsk vilâyetiniñ arbiy memuriyet yolbaşçısı Pavlo Kırılenko Soledar Donbasnıñ eñ sıcaq noqtası ola, amma şeer dayana, dep ayttı.
Yanvarniñ 10-nda Britaniya istihbaratı Rusiye ordusı soñki dört künde Soledar şeerinde taktik ilerilev yaptı ve, büyük ihtimalnen, «şeerniñ büyük qısmını kontrol ete». İstihbaratnıñ malümatına köre, uruşlarnıñ bir qısmı çalışmağan tuz şahtaları içün kete, bu regionda olarnıñ uzunlığı yer altında 200 kilometr ola – eki taraf da bu şahtalar vastasınen diger tarafnıñ cebesine keçmesinden qorqa.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
