Amerika Birleşken Devletleri Rusiye işğal etken Qırımda olğan patlavlardan soñ Rusiye tarafınıñ cevabını taqip eteler.
«Biz rusiyelilerniñ Aqyardaki Rusiye Federatsiyasınıñ Arbiy-deñiz flotunıñ gemilerine ücüm aqqında haber ve beyanatlarını taqip etemiz. Patlavlar olğanına qıymet kesemiz, amma ketirilgen zararğa qıymet kesilüvini paylaşmaycaqmız, bu patlavlarnıñ sebebi ne olğanınen bağlı qoşma malümat bermeycem», – dep ayttı brifingde Pentagon vekili.
O, bu patlavlarnıñ aqibetlerini izaatlamaqtan vazgeçti, hususan patlavdan soñ «Admiral Makarov» Rusiye fregatı zarar kördimi tasdıqlamadı, amma inkâr da etmedi.
ABD Mudafaa nazirliginiñ vekili de Aqyardaki patlavlarğa Amerika uçucısız yalı mudafaa gemileriniñ alâqası olğanına dair malümatnı tasdıqlamadı ve inkâr etmedi.
Oktâbrniñ 29-nda gece ve saba Aqyarda patlav sesleri, top ve ateş sesleri eşitildi. Soñra şeerniñ Rusiye akimiyeti ve Rusiye Mudafaa nazirligi Rusiye Qara deñiz flotuna qarşı «terror» ücümi aqqında bildirdi. Olarnıñ malümatına köre, ücümde doquz uçucısız ve yedi deñiz uçucısızı işletildi.
Rusiye Mudafaa nazirligi ücümni Ukrayına arbiyleri kerçekleştirdi. Büyük Britaniya Mudafaa nazirligi qabaatlavnı red etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
