188 yolcu bulunğan Air China Qıtay ava şirketiniñ uçağı bagajda çıqqan yanğın signalizatsiyası çalışıp başlağan soñ Anadır ava limanında acele qonmağa mecbur oldı, dep bildire martnıñ 5-nde Rusiyeniñ Çukotka muhtar okrugınıñ ükümet saytı.
«Ava limanınıñ bütün hızmetleri uçaqnıñ yahşı qonmasını temin etti. Ekipajnıñ malümatına köre, uçaqta 188 yolcu bar edi. Kimse zarar körmedi», – dep aytıla haberde.
Berilgen malümatqa köre, uçaq Pekinden Los Angeleske yol alğan edi. Mecburiy qonuvdan soñ yolcular şişirme merdivenlerden endi.
Çukotka valisi Roman Kopin yolcularnı yerleştirmege kerek olsa, musafirhane ve naqliyatnı azırlamağa vazife berdi. Region yolbaşçısınıñ emrinen valiniñ birinci muavini Leonid Nikolayev ava limanına keldi.
Çukotka ükümetiniñ malümatına köre, al-azırda bütün yolcular ava limanı binasında, halqara uçuş ve VIP salonı alanında yerleştirildi.
«İnterfaks» haber etkenine köre, uçaqta yanğın haberi yañlış çıqtı. Rusiye aviatsiyasınıñ Air China ile añlaşqanına köre, yedek uçağı Anadır ava limanında yerli saatnen saat 17:00-de (Qırım saatına köre saat 08:00) kelmeli.
