Rusiye nezaretindeki Aqmescit başı Yelena Potsenko sakinlerge suvnı iqtisat etmege rica etti.Bunı o "RİA Novosti" agentliginde matbuat konferentsiyasında ayttı.
"Vaziyet pek qıyın. Suv anbarları saylaşa, bu mesele bar ve onı gizlemege çare yoq. Cumhuriyet akimiyeti bu sualni er kün baqa", - dedi Protsenko.
Onıñ aytqanına köre, Alma Tarhan yapma gölünde tamir işleri yapıla ve mayısnıñ soñunace anda suv berilecek.
"Bundan ğayrı İvanov suv anbarı qurula. O da mayısnıñ soñunace çalışıp başlaycaq", - dedi Protsenko.
O dedi ki, akimiyet "yağanaqlarğa ümüt etecek".
"Yağanaqlarsız bir yıl oldı, amma bu Qırım içün yañı bir şey degil. Esası, er kes sağ-selâmet olsun. Şimdi şeeriminiñ sakinlerine muracaat etem: olduqça suvnı iqtisat etiñiz ve bugün o qadar degerli olğan resursqa qıymet kesiñiz", - dedi Protsenko.
Daa evel bildirildi ki, Aqmescitte tamir işleri sebebinden şeerniñ bir qısmı bir afta cedvel boyunca suv alacaq.
Martnıñ 12-nde Rusiye kontrolindeki Qırım ükümetiniñ reisi Yuriy Gotsanük, suv boru hatları eskirgeni içün yarımadada içme suvunıñ 50 fayızı coyula, dep bildirdi.
Keçken afta Qırımnıñ Rusiye yolbaşçısı Sergey Aksenovnıñ bildirgenine köre, yağanaqlar olmasa bile, Aqmescitniñ üç esas suv çoqrağı olğan Ayan yapma gölü, Aqmescit ve Partizan suv anbarlarındaki suv yedegi şeerni 3,5 ay devamında toqtamayıp suvnen temin etmek içün yeter.
Herson vilâyetiniñ devlet memuriyeti, aprelniñ 4-nde Şimaliy-Qırım kanalı toldurıldı ve kanaldan işğal etilgen Qırımğa suv berilmey, dep işandırdı.
Ukraina prezidentiniñ Qırım Muhtar Cumhuriyetindeki daimiy temsilciligi, Rusiye işğal etken Qırım ve Aqyarğa Şimaliy-Qırım kanalından suv berilüvi tek yarımada işğalden qurtarılğan soñ ola bile, dep hatırlattı.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
