«Veciye Kaşka davası» boyunca qabaatlanğan qırımtatar faali Asan Çapuh uzun bir müddet tedaviylenmeli. Bu aqta advokat Ayder Azamatov Qırım.Aqiqatqa tarif etti. O, oktâbrniñ 11-nde Çapuhnı ziyaret etti.
«Çapuh sağlığı fena olğanını şikâyet ete. Qan basımı eskisi kibi o qadar yüksek degil, amma kene de bar. Qolları ve ayaqları raatsızlay. Ekimlerniñ qararını bekleyler, tamçılıq qoyacaqlar ve doğru tedaviyleme belgileycekler. Eski alınen qıyaslansa, pek azğan. Şimdi bam-başqa adam. O, maneviy olaraq pek melül, siñir sisteması bozuq», – dep ayttı Azamatov.
Onıñ aytqanına köre, Çapuh sağlıq vaziyetini eyileştirmek içün beden meşğuliyetlerini yapa.
«Adale, buğum ve el-ayaqlarını çalıştırmaq içün çeşit areketler yapa. Hastahanede tahminen 10 kün yattı. Bu vaqıt devamında yaşı sebebinden bir çoq yeri areketsiz qaldı», – dep qoştı o.
Oktâbrniñ 10-nda Asan Çapuhnı «sağlıqniñ kritik vaziyeti ve SİZOda tedaviylenmege imkân olmağanından» SİZOdan yiberip, ev apsine alğanlar.
«Veciye Kaşka davası» boyunca qabaatlanğan Asan Çapuh tibbiy yardım kösterilmesini talap etip, sentâbrniñ 15-nde Aqmescit SİZOsında ilân etken açlıqnı toqtattı. Çapuh alı fenalaşqanı sebebinden advokat Ayder Azamatovnıñ ricasından soñ açlıqnı toqtattı.
Ukraina Tış işler nazirligi Rusiyeden Asan Çapuhnı azat etmesini talap etti.
2017 senesi dekabr ayında Çapuh SİZOda mikroinsult keçirdi ve acele sürette hastahanege alınması kerek edi. Soñra tibbiy teşkerüvi yapıldı, mabüsniñ diagnozı ve alı advokatı içün qala.
2017 senesi noyabrniñ 23-nde Aqmescitte Rusiye telükesizlik hadimleri – Kâzim Ametov, Asan Çapuh, Ruslan Trubaç ve Bekir Degermenci kibi bir gruppa qırımtatarnı tutıp aldı.
Sentâbrniñ 11-nde Rusiye nezaretindeki Aqmescit Kiyev rayon mahkemesi, «Veciye Kaşka işiniñ» iştirakçilerini eki ayğa daa apiste qaldırdı. Olar Türkiye vatandaşı Yusuf Aytandan para talap etüvde şeklene. Rusiye telükesizlik hadimleri olarnı tutqan maalde qırımtatar milliy areketiniñ veteranı Veciye Kaşka yaramay. Daa soñra qadın vefat ete.
Qırımtatar milliy areketiniñ faali Nariman Celâl, Türkiye vatandaşı, Veciye Kaşkanıñ qorantasından para hırsızlağan edi, dep bildire.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
