İşğal etilgen Qırımda Rusiye mahkemesi tarafından apiske alınğan Aqmescit sakini Denis Kaşuknıñ anası Katerina Kaşuk taqip etileceginden qorqıp, Qırımdan esas Ukrainağa ketti. Bu aqta o, Qırım.Aqiqat Radiosınıñ yayınında ayttı.
«Biz (aqayımnen – QA) eki cemidan alıp, mında (Kyivge – QA) köçtik. Er şeyni anda qaldırdıq. Evni… Olğan er şeyni», – dep ayttı Katerina Kaşuk.
Onıñ qayd etkenine köre, köçmesini oğlu mahkemede laf etkende istedi.
«Onıñnen mahkemede laf etkenimde şöyle dedi: «Ana, mında mıtlaqa ketmek kereksiñiz. Mında sizge qarşı çoq malümat bar. Mından acele ketmek kereksiñ. Bütün qoranta ketmeli. Mında qaçuv ve çeşit malümat çoq», – dep tarif etti qadın.
Advokat Nazim Şeyhmambetov, Rusiye FSBsi Aqmescit sakini Denis Kaşuknı silâ satın alğanından ve saqlağanından şübheli sayıp tuttı. Denis Kaşuknıñ ömür arqadaşı Olga Qırım.Aqiqatqa izaat berip, dekabrniñ 17-nden berli bağda olmağanını ve evlerinde tintüv keçirilgenini bildirdi.
Advokat Nazim Şeyhmambetov, FSB Kaşuknı eki madde – Rusiye Ceza kodeksiniñ 222-nci ve 222.1-incisine istinaden («qanunsız satın aluv, satış, saqlap, silâ, onıñ esas parçalarınıñ taşıması») – şübheli saya, dep bildirdi.
Rusiye kontrolindeki Aqmescitniñ Kiyev rayon mahkemesi dekabrniñ 20-nde Aqmescit sakini Denis Kaşuknıñ sıñırlav tedbirini belgilep, onı 2020 senesi fevralniñ 18-ne qadar SİZOğa aldı.
Ukraina Tış işler nazirligi işğal etilgen Qırımda Kaşuknıñ apiske alınmasına qarşı narazılıq bildirdi.
