Rusiye Federatsiyasınıñ arbiyleri Pavloğradqa darbe endirdi, al-azırda yaralanğan 28 insan aqqında malümat bar, dep bildirdi Dnipropetrovsk vilâyetiniñ yolbaşçısı Öleksandr Ğanja.
"Rusiyelilerniñ Pavloğradqa qarşı ücümi sebebinden 28 kişi yaralandı. Üçü ağır alda reanimatsiyada buluna. Ekimler ayatlarını qurtarmaq içün çalışa".
Prezident Volodımır Zelenskıy Pavloğradqa qarşı darbeni ve Hersonğa qarşı idare etilgen ava bombaları, Sumı, Harkiv ve Odesa vilâyetlerine qarşı darbelerni izaatladı.
"Er kün Rusiye insanlarımıznı terrorizmge oğratmağa devam ete. Ukrayinağa qarşı çeşit silâ qullana: ava bombaları, raketa, dronlar. Buña qarşılıq köstere bilmemiz pek müim. Ortaqlarımız yardım etecek qararlarnı bile ve eñ esası – Patriot içün raketa qıtlığı olmamalı. Ortaqlarnıñ bunı eşitmesi müim. 24/7 er seviyede çalışamız", – dedi o.
Bundan evel Rusiyeniñ Pavloğradqa qarşı ücümi neticesinde üç kişi can berdi ve 19 kişi yaralandı, yaralanğanlar arasında eki yaşında bala bar, dep haber etildi.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.