Rusiye ordusı Dnipropetrovsk vilâyetindeki Pavlograd şeerine ücüm etti, dep haber etti Vilâyetniñ arbiy memuriyet yolbaşçısı Oleksandr Ganja.
Başta yaralanğan bir kişi aqqında belli oldı – 18 yaşında oğlan, orta ağır alda hastahanege alınğan edi. Soñra Ganja yaralanğan daa eki insan aqqında bildirdi: 43 ve 45 yaşında erkekler, olar da hastahanede.
Berilgen malümatqa köre, Pavlogradda beş kişi yaralandı.
"Olarnıñ arasında – 6 yaşında oğlançıq. Bala evde tedaviylenecek", – dedi Ganja.
Vilâyet yolbaşçısı Pavlogradda Rusiye ücüminden soñ yanğın ve zarar körgen çoq qatlı bina aqqında bildirdi.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.