Rusiye ilhaq etilgen Qırımda arttırğan ordu sayısı, qırımlılarnıñ yaşayışına yahşı tesir etmeycek, dedi Qırım.Aqiqatqa intervyü bergende Ukraina Tış İşler Naziri Pavlo Klimkin. O, yarımada vaziyetine “quturğanaskerleştirme” dedi.
“Bu nasıldır “askeriy ada”, ondan Suriye ve Yaqın Şarqtaki aferalarğa qol tutula. Bu - yaqında adiy adamlar yaşayışına lâyıq olmaycaq büyük arbiy forpost. Olacaq ya da paraşütçiler, ya da askerler, ya da asıl özüni tapıp olamağan adamlar”, - dedi Klimkin.
Daa TİN-niñ başı, Qırımğa kelgen Ukraina vatandaşları havfsızlıqta olmağanını, ve Rusiye vatandaşları ilhaq etilgen yarımada yerine Türkiye kurortlarını afzal körgenini, ayttı.
Rusiye Mudafaa naziri Sergey Şoygu 2019 yılı mart 11-inde, Rusiye Qırımda ordu sayısını arttırdı, dep bildirdi. Onıñ aytqanına köre, bu “yarımada topraqlarını ve Qara Deñizde Rusiye aqlarını qoruy”.
2014 yılı Qırım ilhaqından soñ Rusiye yarımadada devamlı arbiy idmanlarnı keçire. Ukraina Baş Ştabında Rusiye askerlerniñ Qırımdaki areketlerini qanunsız sayalar.
