Oktâbrniñ 13-nde RF Qara deñiz flotunıñ devriye gemisi "Pavel Derjavin" ekinci kere zarar kördi ve bir qaç kilometr çetke çekildi. Bunı Ukrayina Arbiy deñiz quvetleriniñ matbuat kâtibi, üçünci rang kapitanı Dmitro Pletençuk bildirdi.
"Pavel Derjavin" devriye gemisi ekinci kere zarar kördi ve qaza yerinden çekildi. Bir qaç kilometr çetke çekildi. Bekleymiz", - dep ayttı o.
O vaqianıñ tafsilâtını açıqlamadı ve haber vastalarını resmiy olmağan ve teşkerilmegen malümatnı darqatmamağa çağırdı.
Oktâbrniñ 13-nde haber vastaları Ukrayina Telükesizlik hızmeti Ukrayina Arbiy Deñiz Quvetleri ile birlikte "Buyan" qanatlı raketalar taşıyıcısı ve "Pavel Derjavin" gemisine ücüm etkenleri aqqında bildire. Haber etilgeni kibi, gemilerge deñev silâ ile deñiz dronları vatsasınen ücüm etilgen.
Evel Aqyarda küçlü patlav yüz berdi, patlav atta şeerniñ uzaq yerlerinde is etildi, dep bildirgen ediler. Şeerniñ işğal yolbaşçısı Mihail Rzvojayev patlav RF arbiyleriniñ talimleri ile bağlı, dep bildirdi. Aynı zamanda "Krımkiy veter" telegram kanalı deñizde "Buyan-M" lehaysınıñ gemisi patlağanı aqqında bildirdi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
