Ukrayına prezidenti ofisiniñ yolbaşçı muavini Kırılo Tımoşenko Kyivge «kelgenler» bar, dep bildirdi.
«Kyiv. İlk malümatqa köre, şeerniñ sol tarafında energetik teminlev obyektine 3 darbe endirildi», – dep yazdı o, Telegramda.
Şeer yolbaşçısı Vitaliy Kliçko patlavlar Desnânskıy rayonında oldı, dep bildirdi.
İçtimaiy ağlarda Kyivdeki patlav sesleri aqqında haber etildi.
Bundan ğayrı, oktâbrniñ 18-nde saba Rusiye ordusı Dnipro ve Jıtomır energetika obyektlerine ateş açtı. Harkivdeki patlavlar aqqında da haber etildi.
Oktâbrniñ 17-nde saba Kyivniñ Şevçenko rayonında patlavlar oldı. Rusiye Federatsiyasınıñ ordusı cenübiy yönelişten kamikadze-dronlarınen şeerge ücüm etti. Kyivde mesken ev viran etilgeni içün dört insan elâk oldı.
Soñki vaqıtları Rusiye ordusı Ukrayına energetik infrastruktura obyektlerine ücüm ete. Keçken afta büyük ücüm vaqtında 15 obyekt zarar kördi. Oktâbrniñ 17-nde Rusiye ordusı Kyiv, Dnipropetrovsk ve Sumı vilâyetiniñ kritik infrastrukturasına darbe endirdi.
Büyük ücüm başlağanından Moskva, delil ve şaatlıqlarğa baqmadan, vatandaşlarğa ücüm etkenini inkâr ete.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
